"Yumşaq güc"ün sərt üzü də var
Bakı, 21 dekabr, AZƏRTAC
İki il əvvəl dünyaya öz haqqını tanıdan Azərbaycan cəmiyyətinin qeyri-hökumət və media sektoru Xankəndi yolunda yeni bir zəfər tarixi yazır. Media və QHT nümayəndələrindən ibarət qruplar Şuşa-Xankəndi yolu istiqamətində aksiya keçirir. Tələbləri çox sadədir - öz torpaqlarına keçə bilmək. Sanki tarix başqa formada və məzmunda təkrar olunur. 34 il əvvəl də Azərbaycan xalqı Topxanada ağacların qanunsuz kəsilməsinə etiraz olaraq meydana toplaşdı, sərt hava şəraitinə, imperiya basqılarına rəğmən, 17 gün meydandan dağılmadı. Bu gün yenə də tələblər ekoloji istismarla bağlıdır. Uzun müddətdir ki, Qarabağ bölgəsində ekoloji fəlakətlər törədilir, meşələrimiz qırılır və yandırılır, çaylarımız və göllərimiz çirkləndirilir, təbii ehtiyatlarımız talan edilir. Rusiya sülhməramlıları nəzarət etdikləri ərazidə qanunsuz fəaliyyət göstərən, qaçaqmalçılıq yolu ilə əlvan metal yataqlarımızı qarət edən cinayətkarlara Azərbaycanın rəsmi dövlət qurumlarının qərarlarını başa sala bilməyiblər. Beləliklə, rəsmi dövlət qurumlarının qanuni fəaliyyətinə maneə törədilib. Belə bir hal vətəndaş cəmiyyəti təmsilçilərini narahat etməyə bilməzdi. Belə aksiyaların keçirilməsi açıq cəmiyyətlərdə mütəmadi olaraq baş verən demokratik proseslərdir. QHT-lər öz funksiyalarına uyğun olaraq cəmiyyəti narahat edən müxtəlif məsələlərlə bağlı aksiya keçirməklə diqqəti bu və ya digər problemin həllinə yönəltməyə çalışırlar. Bu, həm də dövlət və xalq olaraq suverenliyimizin qorunması üçün həyata keçirilən “yumşaq güc” siyasətidir. Ən geniş anlamda “yumşaq güc” hər hansı ölkənin mədəni, iqtisadi, siyasi potensialını reallaşdırma səviyyəsi ilə bağlıdır. Burada daxili siyasətlə yanaşı, böyük ölçüdə xarici siyasət də ciddi şəkildə nəzərə alınır. Yəni, əslində, söhbət dövlətin öz gücünü təkcə “hərbi əzələləri” ilə deyil, paralel surətdə və ya eyni zamanda, digər sahələr (iqtisadiyyat, mədəniyyət, hüquq və s.) üzrə, çoxşaxəli şəkildə təsbit etmək, bunun nəticəsində siyasi, geosiyasi və digər maraqlarını daha əlverişli şəkildə reallaşdırmaq bacarığından gedir.
Bu fikirləri AZƏRTAC-a açıqlamasında Milli Məclis sədrinin müavini Fəzail İbrahimli söyləyib.
Fəzail İbrahimli bildirib ki, Azərbaycanda müvəqqəti yerləşdirilmiş rus “sülhməramlılar”ı onların məsuliyyət zonasında azərbaycanlıların keçirdikləri aksiyanı öz siyasi məqsədləri üçün istifadə etməyə çalışır. Laçın dəhlizinin Azərbaycan tərəfindən bağlandığını elan edən rus "sülhməramlılar”ı yerli ermənilərlə azərbaycanlılar arasında münaqişəni dərinləşdirməklə regionda mövcudluğunu uzatmaq istəyir. Ancaq proseslərin rusların xeyrinə nəticə verəcəyi ehtimalı sıfıra bərabərdir. Azərbaycan dövlətinin istifadə etdiyi "yumşaq güc" siyasəti həm erməniləri, onların havadarlarını, həm də rusları çaşqın vəziyyətə salıb və qarşı tərəfi vəziyyətdən çıxmaqda aciz edib. Dünya ermənilərinin və rusların öz istədikləri kimi təqdim etmələrinə baxmayaraq, dünya ictimaiyyəti azərbaycanlıların keçirdikləri aksiyanı biganə qarşılayır. Heç şübhəsiz, bu fakt da onu təsdiqləyir ki, dünya erməni yalanlarına inanmır və erməni yükünü atmağa çalışır. Fakt budur ki, Xankəndi 1988-ci ildən erməni separatizminin əsas mərkəzi olub, bu, indi də belədir. Ukraynada separatizmə qarşı yaxa cıran Qərb Cənubi Qafqazın qara yarasına çevrilən erməni separatizminin kökünün kəsilməsini niyə istəməsin?
“Aksiya həm də onu sübut etdi ki, ərazi bizə məxsusdur, burada söz sahibi kimdir və rus "sülhməralılar”ın məsuliyyət zonasında yaşayanların taleyi Azərbaycandan asılıdır. Bu aksiya, eyni zamanda, onu göstərdi ki, Azərbaycan dövləti, xalqı öz məqsədlərinə çatmaq üçün hər cür əziyyətə, hətta əliyalın olsa belə ölməyə və öldürməyə qadirdir. Azərbaycan milli ruhun silaha əliyalın qalib gəlmək bacarığını 1990-cı ilin yanvarında sübut edib. Ancaq indi Azərbaycanı qüdrətli edən müzəffər Ordusu, qalib xalqı, sarsılmaz siyasi iradəsi var. Yeri gəlmişkən, aksiya iştirakçılarının təhlükəsizliyi Azərbaycan Daxili İşlər Nazirliyinin Daxili Qoşunlarının və polis əməkdaşları tərəfindən təmin edilir.
Əgər bu aksiyalar ermənilər tərəfindən aparılan qeyri-qanuni iqtisadi fəaliyyətin dayandırılmasına gətirib çıxarmasa və müvafiq dövlət qurumlarına monitorinq aparılması üçün lazımi şərait yaradılmasa, Azərbaycanın hüquq-mühafizə orqanları ərazidə baş verən cinayət əməllərinin qarşısını almaq üçün adekvat güc tətbiq edə bilər. Xankəndidə özbaşınalıqla məşğul olan cinayətkar dəstələr anlamalıdır ki, onlar Azərbaycan ərazisində yaşayırlar və ölkə qanunlarını bilərəkdən pozmaq cinayət məsuliyyəti yaradır. Bu aksiyalardan sonra da onlar öz cinayət əməllərini davam etdirsələr, o zaman qanun öz sözünü deyəcək. Azərbaycan “Dəmir yumruğ”unun qüdrətini təsdiq edib. Bu gün xalqın “yumşaq güc”ündən dərs götürməyənlər dövlətin sərt üzünü də görə bilərlər”, - deyə Milli Məclis sədrinin müavini fikirlərini yekunlaşdırıb.
Bölmənin digər xəbərləri
