DÜNYA
ABŞ-da kiberhücum: Səhiyyə xidmətləri dayandırıldı
Bakı, 5 avqust, AZƏRTAC
ABŞ-ın Kaliforniya, Texas, Konnektikut, Rod-Aylend, Pensilvaniya ştatlarında xəstəxanalara edilən kiberhücum nəticəsində səhiyyə xidmətləri dayandırılıb.
AZƏRTAC xarici KİV-lərə istinadla xəbər verir ki, xəstəxanalardakı kompüter sistemlərinə edilən kiberhücum bəzi xidmət otaqlarının bağlanmasına və təcili yardım maşınlarının yanlış yönləndirilməsinə səbəb olub. Kibertəhlükəsizlik qrupları problemi həll etmək üçün işə başlasa da, bir çox insan sağlamlıq xidmətlərindən məhrum olub və pasiyentlər müalicə üçün başqa xəstəxanalara göndərilib.
Kiberhücuma məruz qalan sağlamlıq mərkəzi - “Prospect Medical Holding”in verdiyi açıqlamada aşağıdakı ifadələr yer alıb: “Kiberhücum haqqında öyrəndikdən sonra biz mühafizə məqsədilə sistemlərimizi oflayn vəziyyətə saldıq və kibertəhlükəsizlik üzrə mütəxəssislərin köməyi ilə araşdırmaya başladıq. Araşdırmalarımız davam etdiyi müddətdə biz mümkün qədər qısa zamanda normal əməliyyatlara qayıtmaq üçün səylə çalışırıq və diqqətimizi xəstələrimizin təcili ehtiyaclarını qarşılamağa yönəldirik”.