ABŞ-ın mərkəzi ştatlarında güclü qasırğa baş verib
Vaşinqton, 3 aprel, AZƏRTAC
ABŞ-ın mərkəzi ştatlarında güclü qasırğa başlayıb.
AZƏRTAC-ın məlumatına görə, yerli vaxtla günorta saatlarında başlayan “xüsusilə təhlükəli” kateqoriyaya aid edilən qasırğa Arkanzas, İllinoys, İndiana, Kentukki, Missuri, Missisipi və Tennessi ştatlarını əhatə edib. Hadisə nəticəsində Missuri və Arkanzas ştatlarında evlər və fermalar dağılıb, elektrik naqilləri sıradan çıxıb. Xəsarət alanlar barədə hələlik məlumat yoxdur. Oklahomada yerləşən Fırtına Proqnoz Mərkəzinin məlumatına əsasən, Texasdan Men ştatına qədər uzanan ölkənin böyük bir hissəsində 90 milyondan çox insan kəskin hava şəraiti riski altındadır.
Təbiət hadisəsinin sürətlə şərqə doğru irəlilədiyi bildirilir. Sinoptiklərin fırtınanın daha da böyüyəcəyini və dağıdıcı olacağını proqnoz ediblər. Bildirilir ki, Arkanzas, Missuri, Tennessi və Missisipi ştatlarında bir neçə günlük fasiləsiz yağış başlayacaq və bu da genişmiqyaslı daşqınlara səbəb olacaq.
Məlahət Nəcəfova
AZƏRTAC-ın xüsusi müxbiri
Vaşinqton
Bölmənin digər xəbərləri
