Adil Əliyev: Laçın yolundakı aksiya Azərbaycanın yumşaq gücünü göstərir
Bakı, 16 dekabr, AZƏRTAC
Rusiya sülhməramlılarının Azərbaycanın Qarabağ bölgəsində müvəqqəti yerləşdirilməsi 2020-ci il noyabrın 10-da Azərbaycan, Ermənistan və Rusiya liderlərinin imzaladığı üçtərəfli Bəyanatın şərtlərindən biridir və bu şərt dərhal yerinə yetirilib. Amma Bəyanatın digər şərtləri, xüsusilə qanunsuz silahlı birləşmələrin Rusiya sülhməramlılarının məsuliyyət zonasından çıxarılması və nəqliyyat-kommunikasiya xətlərinin, xüsusən də Azərbaycanla Naxçıvan arasında dəhlizin açılması şərtləri hələ də yerinə yetirilməyib. Qanunsuz erməni silahlı birləşmələrinin Qarabağ ərazisindən çıxarılması Rusiya sülhməramlılarının üzərinə düşür. Əgər onlar bu qanunsuz silahlı birləşmələrin onların məsuliyyət zonasından çıxarılmasını təmin edə bilməyiblərsə və ya etmək istəməyiblərsə, deməli, öz vəzifələrinin öhdəsindən gələ bilmirlər və beləliklə, üçtərəfli Bəyanatı pozurlar.
AZƏRTAC xəbər verir ki, bu fikirləri Milli Məclisin sədr müavini, parlamentin Gənclər və idman komitəsinin sədri Adil Əliyev ifadə edib.
Adil Əliyev bildirib ki, Qarabağ ərazisinə silahların gətirilməsinə, qanunsuz səfərlərin edilməsinə, o cümlədən bir qrup İran vətəndaşının Azərbaycanın icazəsi olmadan Qarabağa gəlməsinə, yumşaq desək, göz yumublar. Bu məsələlər də bir daha Rusiya sülhməramlılarının fəaliyyəti haqqında ciddi suallar yaradır, ümumiyyətlə, üçtərəfli Bəyanatın onlar tərəfindən pozulması hallarını üzə çıxarır.
Son günlər azərbaycanlı ekoloq və mütəxəssislərin qanunsuz istismar edilən qızıl və mis-molibden mədənlərində monitorinq aparılmasına sülhməramlı qüvvələrin mane olduqlarını bildirən Milli Məclis sədrinin müavini xatırladıb ki, həmin mədənlərin fəaliyyəti üçün işğal dövründə Kəlbəcər yolundan istifadə edilirdi. Kəlbəcər azad edildikdən sonra mədəndə fəaliyyət dayanmışdı. Amma indi mədənlərdə qeyri-qanuni istismar işlərinin aparılması və materialların Ermənistana daşınması üçün Laçın yolundan istifadə edilir. Yəni, sülhməramlılar Laçın yolu ilə müvafiq material və avadanlıqların daşınmasına imkan verməklə, əslində bu qeyri-qanuni fəaliyyətə dəstək vermiş olurlar. Bu da Azərbaycan ictimaiyyətinin ciddi etirazına səbəb olub.
“Nəticədə bir neçə gündür ki, Azərbaycanın ətraf mühitin qorunması üzrə ictimai fəalları, vətəndaş cəmiyyəti və QHT nümayəndələri Şuşa-Laçın yolunda ekoloji tələblərlə etiraz aksiyası keçirirlər. Göründüyü kimi, hələ də Rusiya sülhməramlılarının komandanı onlarla görüşməyib və problemin həlli istiqamətində addım atmayıb. Əksinə, Rusiya sülhməramlılarının azərbaycanlı ictimai fəalların və QHT nümayəndələrinin dinc aksiyasına mane olmaq cəhdləri, onlarla kobud davranış halları mediada yayılan kadrlardan görünür.
Beləliklə, Rusiya sülhməramlılarının komandanı Volkov nəhayət ki, Rusiya Prezidenti Vladimir Putinin də imzaladığı üçtərəfli Bəyanata uyğun fəaliyyət aparmalı və müvəqqəti yerləşdikləri ərazidə qeyri-qanuni fəaliyyətlərin, ətraf mühitə ziyan vuran işlərin dayandırılmasını, qeyri-qanuni silahlı dəstələrin neytrallaşdırılmasını və azərbaycanlı mütəxəssislərin monitorinq aparmasını təmin etməlidir. Əks təqdirdə, bu onların fəaliyyətini sual altında qoyur”, - deyə Milli Məclisin sədr müavini diqqətə çatdırıb.
Adil Əliyev Azərbaycan vətəndaş cəmiyyətinin Şuşa-Laçın yolu ərazisində keçirilən aksiyasının böyük rezonans doğurduğunu və Azərbaycanın yumşaq gücünün səmərəliliyini göstərdiyini vurğulayaraq deyib: “Bu aksiya məsələyə beynəlxalq ictimaiyyətin diqqətini çəkib. Ermənistanın və bir sıra dairələrin iddialarının əksinə olaraq, aksiya Qarabağda yaşayan ermənilər üçün heç bir təhdid törətmir. Ruben Vardanyan kimi insanların simasında hadisələrin təhrif edilməsi və azərbaycanlılarla ermənilərin sülh şəraitində və dinc yaşayışına xaricdən gəlmiş emissarların mane olduğu, bu aksiyanın gedişində özünü açıq şəkildə göstərdi. Digər tərəfdən, beynəlxalq reaksiyalardan bəzən açıq, bəzən də sətiraltı surətdə Qarabağ mövzusunun Azərbaycan Respublikasının daxili işi hesab olunduğu sezilir. Hesab edirəm ki, bu məqamlar Azərbaycan vətəndaş cəmiyyətinin və QHT-lərinin keçirdiyi dinc aksiyanın təsirli olduğundan xəbər verir və postmünaqişə dövründə Azərbaycanın yumşaq gücünün önəmini göstərir”.
Bölmənin digər xəbərləri
