Adil Seifullin: Türk Xəbər Agentlikləri Alyansı regional əməkdaşlığın əsas platformalarından birinə çevrilib
Şuşa, 14 iyul, AZƏRTAC
Türk dünyası təkcə ortaq tariximiz, dilimiz və mədəniyyətimiz deyil. Bu, həm də etimada, əməkdaşlığa və birgə inkişafa əsaslanan geniş bir məkandır. Bu gün Türk Xəbər Agentlikləri Alyansı regional əməkdaşlığın əsas platformalarından birinə çevrilib və burada irəli sürdüyümüz ideyalar konkret layihələr şəklində həyata keçirilir.
AZƏRTAC xəbər verir ki, bu sözləri “Qazcontent” İdarə Heyətinin sədri, Türk Xəbər Agentlikləri Alyansının (ATNA) prezidenti Adil Seifullin IV Şuşa Qlobal Media Forumu çərçivəsində keçirilən ATNA-nın İcraiyyə Komitəsinin iclasında deyib.
O qeyd edib ki, xalqlarımızı minilliklərə söykənən tarixi bağlar birləşdirir. Müasir reallıqlar isə ticarət, nəqliyyat, elm, təhsil və rəqəmsal texnologiyalar sahələrində yeni əməkdaşlıq imkanları yaradır. “Bu gün qarşımızda duran əsas vəzifə birgə səylərlə bu əməkdaşlığı real məzmunla zənginləşdirməkdir. Media sahəsində informasiya mübadiləsini gücləndirməli, ölkələrimiz haqqında xəbərləri birbaşa ilkin mənbədən əldə etməli və hər bir hadisəni məhz onun baş verdiyi ölkənin informasiya resurslarına istinadən işıqlandırmalıyıq. Bu yanaşma məlumatın operativliyini, dəqiqliyini və etibarlılığını artıracaq”, - deyə Adil Seifullin bildirib.
Bölmənin digər xəbərləri
