AZƏRTAC-ın Yunanıstan paytaxtından aldığı xəbərdə bildirilir ki, Olimpiadaya gələn dövlət başçıları avqustun 14-də Afinada rəmzi Olimpiya sülh xartiyası imzalamışlar.

Olimpiada dövründə barışıq ideyasını Yunanıstan hökuməti Afina Oyunlarına hazırlıq zamanı irəli sürmüş və 2003-cü ilin noyabrında bu ideya BMT qətnaməsi ilə dəstəklənmişdir. Olimpiya sülh xartiyası bütün dövlətləri qədim ənənəni dirçəltməyə və Olimpiada dövründə hərbi əməliyyatlardan çəkinməyə, gələcəkdə isə bütün dünyada sülhü bərqərar etməyə çağırır. Olimpiya sülhünün devizi belədir: “Əgər biz 16 gün sülhü qoruya bilsək, onda nə üçün sülhü həmişəlik bərqərar edə bilməyək?”.

Sülh xartiyasını imzalayanlar arasında Yunanıstanın Baş naziri Kostas Karamanlis, AFR Prezidenti Horst Keller, Böyük Britaniyanın Baş naziri Toni Bleyer, Bolqarıstan və Ukrayna hökumətlərinin başçıları Simeon Sakskoburqqotski və Viktor Yanukoviç, İspaniya kraliçası Sofiya, Monako prinsi Albert, Polşa və Rumıniya prezidentləri Aleksandr Kvasnevski və İon İliyesku, Albaniyanın Baş naziri Fatos Nano da var. Xartiyanı BOK-un keçmiş və hazırkı prezidentləri Xuan-Antonio Samaranç və Jak Roqq, məşhur idmançı Sergey Bubka da imzalamışlar.