AĞSUDA HEYDƏR ƏLİYEV MƏRKƏZİ AÇILMIŞDIR
Bakı, 30 oktyabr (AZƏRTAC). Oktyabrın 29-da Azərbaycan Prezidenti İlham Əliyev və xanımı Mehriban Əliyeva Ağsu şəhərində Heydər Əliyev Mərkəzinin açılış mərasimində iştirak etmişlər.
Prezident İlham Əliyev açılışı bildirən lenti kəsdi, Heydər Əliyev Mərkəzi ilə tanış oldu.
Məlumat verildi ki, inşasına 2008-ci ildə başlanmış mərkəzin ümumi tikinti sahəsi 302 kvadratmetrdir. İkimərtəbəli binada 30 yerlik konfrans, eksponat zalları, dərnək, ofis və kompyuter otaqları vardır.
Binanın birinci mərtəbəsində ulu öndərin büstü qoyulmuşdur. Burada ümummilli lider Heydər Əliyevin həyatını və dövlətçilik fəaliyyətini əks etdirən 4 bölmə yaradılmışdır. Bu bölmələrdə ulu öndərin ölkəmizin beynəlxalq imicinin, müstəqilliyinin möhkəmləndirilməsi üçün gördüyü möhtəşəm işlərdən bəhs edən eksponatlara da geniş yer ayrılmışdır.
İkinci mərtəbədə informasiya texnologiyaları, xarici dillər, texniki yaradıcılıq otaqları və işçi heyət üçün kabinetlər yerləşir. Binanın hər iki mərtəbəsində ümummilli liderin həyat və fəaliyyətini əks etdirən fotoların, müxtəlif məlumatların yer aldığı 212 tablo, 32 kompyuter dəsti, elektron köşk, geniş ekranlı monitor, səsgücləndirici qurğular yerləşdirilmişdir.
Dövlətimizin başçısına məlumat verildi ki, mərkəzin birinci mərtəbəsində yerləşən Heydər Əliyev Muzeyi 4 bölmədən ibarətdir. Birinci bölmədə ulu öndərin yeniyetmə və gənclik dövrlərini əks etdirən fotoşəkillər əksini tapmışdır. İkinci bölmədəki fotoşəkillər Heydər Əliyevin 1969-1982-ci illərdə respublikamızın sosial-iqtisadi inkişafı və digər sahələrin tərəqqisi ilə bağlı gördüyü işlərdən söhbət açır. Üçüncü bölmədə ümummilli liderin 1993-cü ildə xalqımızın təkidi ilə hakimiyyətə qayıdışından sonra ölkəmizin ictimai-siyasi, sosial və mədəni həyatındakı quruculuq işlərindən bəhs edən materiallar toplanmışdır. Dördüncü bölmədə isə ümummilli liderin respublikamıza rəhbərlik etdiyi müxtəlif illərdə Ağsuya səfərləri, yerli əhali ilə görüşləri əks olunmuşdur. Burada ulu öndərin həyatına və dövlətçilik fəaliyyətinə həsr olunan filmlərin nümayişi üçün elektron köşk də vardır.
Sonra Prezident İlham Əliyev və xanımı Mehriban Əliyeva mərkəzin ikinci mərtəbəsi ilə tanış oldular. Dövlətimizin başçısına məlumat verildi ki, mərkəzin ikinci mərtəbəsində “Heydər Əliyev və uşaqlar” bölməsi fəaliyyət göstərir. Burada ulu öndərin uşaqlara diqqət və qayğısını əks etdirən fotoşəkillər toplanmışdır.
Mərkəzin informasiya texnologiyaları kabinetində müasir standartlara cavab verən 17 kompyuter lokal şəbəkəyə qoşulmuşdur. Texniki yaradıcılıq otağında isə uşaqların əl işlərindən ibarət sərgi nümayiş etdirilir. Burada radio-telemexanika dərnəyinin üzvləri olan uşaqların hazırladıqları elektron avadanlıq da diqqəti cəlb edir. Kompyuterlərlə təchiz olunmuş xarici dillər kabinetində isə ingilis və rus dillərinin tədrisi üçün lazımi şərait yaradılmışdır.
Dövlətimizin başçısı mərkəzin xatirə kitabına ürək sözlərini yazdı.
######
 |
 |
 |
 |
 |
 |
 |
Bölmənin digər xəbərləri
