Aİ-nin ali nümayəndəsi Rusiyaya qarşı yeni sanksiyaların tətbiqinə çağırıb
Bakı, 1 aprel, AZƏRTAC
Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallasın fikrincə, sanksiyalar vasitəsilə Rusiyaya təzyiqin artırılmasına ehtiyac var.
AZƏRTAC xəbər verir ki, Kaya Kallas bunu “El Mundo” qəzetinə müsahibəsində deyib.
“Biz güclü olmalıyıq və amerikalı tərəfdaşlarımızla, dünyadakı digər müttəfiqlərimizlə birlikdə əlimizdə olan bütün sanksiya variantlarını araşdırmalıyıq”, - deyə diplomat Rusiyaya qarşı mümkün təzyiq tədbirləri ilə bağlı sualı cavablandırarkən bildirib.
Kaya Kallas bundan öncə Almaniya, Fransa, İtaliya, Polşa, İspaniya və Böyük Britaniyanın xarici işlər nazirləri ilə birlikdə Ukrayna müharibəsi bitənədək Rusiya aktivlərinin dondurulmuş vəziyyətdə saxlanması ideyasını dəstəkləyib. Martın 31-də həmin ölkələr Rusiyaya qarşı yeni sanksiyalar tətbiq etməyə hazır olduqlarını bəyan ediblər. Həmçinin onlar birgə bəyanatlarında Moskvanı “dərhal və ilkin şərt irəli sürmədən atəşkəslə razılaşmağa” çağırıblar.
Bölmənin digər xəbərləri
