Bakı, 16 avqust, AZƏRTAC

Avropa İttifaqının (Aİ) qanunsuz müşahidə missiyası ilk gündən “Laçın” dövlət sərhədindən buraxılış məntəqəsi ətrafında başlanan “humanitar böhran” şousunun ən mühüm personajlarından biri kimi çıxış etməkdədir. Bu günə qədər "tərəfsiz" qalaraq guya yalnız "müşahidə etdiyi həqiqətləri" qeyd edən, lakin yaydığı fotolar, verdiyi bəyanatlarla Ermənistanın informasiya təcavüzünün mühüm alətlərindən birinə çevrilən Aİ missiyası, analoji davranışın İrəvana fayda vermədiyini görərək artıq informasiya savaşında tərəf kimi davranmağa başlayıb.

Bu fikirləri AZƏRTAC-a açıqlamasında Milli Məclisin deputatı Bəhruz Məhərrəmov söyləyib.

Deputat bildirib ki, ötən gün Ermənistan tərəfi Basarkeçər rayonunun Yuxarı Şorca yaşayış məntəqəsi ərazisində guya Avropa İttifaqının müşahidəçiləri və onların avtomobili istiqamətində Azərbaycan Ordusunun bölmələri tərəfindən atəş açılması barədə məlumat yayıb. Erməni informasiya resurslarında bu dezinformasiya yayıldıqdan sonra ilk saatlarda xəbərləri nə təkzib, nə də təsdiq etməsə də, sonradan Aİ missiyası rəsmi "X" sosial media hesabından ermənilərin iddiasını yalanlayan bəyanat yayaraq bildirdi ki, "missiyanın atəşə tutulması barədə məlumatlar doğru deyil". Lakin bir neçə saat sonra missiya Azərbaycan əleyhinə istifadə edə biləcəyi bu fürsəti qaçırmamaq üçün dezinformasiyaları təkzib edən tviti silərək Azərbaycan tərəfindən atəşə tutulduqları ilə bağlı açıqlamalar veriblər.

“Əlbəttə, Avropa İttifaqının müşahidə missiyası bölgəyə gəldiyi gündən bizim məsələyə münasibətimiz və gözləntilərimiz aydın olub. Azərbaycan ən ali səviyyədə missiyanın xoş olmayan niyyəti barədə fikrini ifadə edib. Lakin Avropa İttifaqının müşahidəçilərinin belə açıq formada ucuz və diletant təxribatların tərkib hissəsi kimi çıxış edəcəyi bizim özümüz üçün də gözlənilməz oldu. Çünki Müdafiə Nazirliyinin yaydığı məlumatda da ifadə edildiyi kimi, "Avropa İttifaqının müşahidəçilərinin Ermənistanda şərti sərhəd istiqamətində səfərlərinin vaxtı, onların hərəkət marşrutu, ərazidəki koordinatları, eləcə də avtomobillərin markası və nömrə nişanları Azərbaycan tərəfinə əvvəlcədən təqdim edilir. Azərbaycan Ordusunun bölmələri missiyanın səfərləri barədə məlumatlıdır". Belə olan halda, o cümlədən Azərbaycan ətrafında süni surətdə beynəlxalq diqqətin artdığı bir zamanda Avropa İttifaqının müşahidəçilərinin atəşə tutulması mümkündürmü, yaxud bu bizə nə verə bilər? Görünən odur ki, ortada yalnız bir təxribat var, o da əvvəlcə təkzib vermək, ardınca isə ittiham etməklə Avropa İttifaqının müşahidə missiyası tərəfindən törədilməkdədir. Aİ missiyası faktiki olaraq özünün qərəzli və şantajçı mövqeyi ilə Ermənistanın saxta informasiya daşıyıcısı funksiyasını yerinə yetirir. Təsəvvür edin, atəşə tutulduqlarını iddia edən beynəlxalq "müşahidəçilər"in atəşə tutulmasını şərh edərkən müsahibədə onların üzü görünmür. Yaxud Ermənistan tərəfinin təqdim etdiyi və guya missiyanın atəşə tutulduğunu sübut etdiyi deyilən videolar faktiki olaraq yararsız səhnələşdirmədən ibarətdir və nəinki Azərbaycan tərəfinin missiya üzvlərinə atəş açmasını sübuta yetirmir, əksinə təqdim olunan görüntülərin qurma olması şübhə doğurmur. Təbii ki, Avropa İttifaqının Ermənistandakı müşahidə missiyasının bu faktlar qarşısında susması və ən azı təmsil etdiyi qurumun nüfuzuna yaraşmayan formada Ermənistanın əlində təbliğat alətinə çevrilməsi təəssüf doğurur. Eyni zamanda, baş verənlər sübut edir ki, İrəvanın da, havadarlarının da resursları artıq tükənir. Açıq böhtan xarakterli üsul və vasitələrə əl atmaları göstərir ki, Qarabağda "humanitar böhran" ssenarisi də, bu şounun müəllifləri özləri də iflasa uğramaqdadır”, - deyə Bəhruz Məhərrəmov vurğulayıb.