Ali təhsil sistemində ən vacib addım beynəlxalq əməkdaşlığın qurulmasıdır – ekspert
Bakı, 24 aprel, AZƏRTAC
Azərbaycanda ali təhsilin keyfiyyətinin artırılması ilə bağlı ən mühüm addım Təhsildə Keyfiyyət Təminatı Agentliyinin fəaliyyətidir. Onun hazırladığı planlar ali təhsil müəssisələrində keyfiyyətin artırılması məsələlərini hədəfləyib.
Bunu təhsil eksperti Qoşqar Məhərrəmov AZƏRTAC-a müsahibəsində söyləyib. Ekspertin sözlərinə görə, agentlik beynəlxalq təcrübəni nəzərə alaraq Azərbaycanın ali təhsil müəssisələri üçün müəyyən standartlar tərtib edib: “Nəticədə universitetlərin qarşısına daxili keyfiyyətin təmin olunması ilə bağlı müəyyən tələblər qoyuldu. Bundan əlavə, müəyyən təlimlər həyata keçirildi, universitetlərdə Keyfiyyət Təminatı mərkəzləri fəaliyyətə başladı. Universitetlərin akkreditasiyası ərəfəsində isə qurum mövcud standartlara uyğun olaraq ali təhsil müəssisələrində müvafiq fəaliyyətini həyata keçirdi”.
Ekspertin sözlərinə görə, Təhsildə Keyfiyyət Təminatı Agentliyi, həmçinin akkreditasiya prosesini həyata keçirəcək mütəxəssislərin yetişməsində mühüm rol oynayır: “Təlim və imtahanların təşkili və mövcud standartlarla tanışlıq peşəkar mütəxəssislərin yetişməsində vacib rol oynayıb. Nəticədə isə Agentlik akkreditasiya və təhsildə keyfiyyət məsələlərini öhdəliyinə götürərək, onların icrasına nəzarət etdi”.
Q.Məhərrəmovun fikrincə, ali təhsildə keyfiyyətin artırılmasında səriştəli rəhbərlərin də rolu vacibdir: “Ali təhsil müəssisələrində tədqiqatın artırılması və təşviqi üçün beynəlxalq reytinqli jurnallarda məqalələri və elmi tədqiqatları çap olunan insanlara əlavə ödənişlər edilməsi qərara alındı. Bu addım universitetlərdə tədqiqat potensialını artırmış oldu. Elm Fondu və beynəlxalq səviyyədə təşkil edilən qrantlar keyfiyyətin artırılması istiqamətində vacib səylər idi. Bu prosesdə universitetlərdən aktiv iştirak edənlər də oldu, zəif fəaliyyət göstərənlər də”.
Ekspert onu da qeyd edib ki, ali təhsil sistemində ən vacib addım beynəlxalq əməkdaşlığın qurulmasıdır: “Universitetlərin bir çoxu dünya miqyasında tanınan, özünü təsdiq edən ali təhsil müəssisələri ilə əməkdaşlıq edərək, ikili diplom proqramları hazırlayıb. Məsələn, Koreya, Türkiyə, Böyük Britaniya, ABŞ və digər ölkələrdəki universitetlərlə müəyyən əməkdaşlıq əlaqələri qurulub. Əməkdaşlıq çərçivəsində tələbələrin mübadiləsi, həm də elm adamları və professor-müəllim heyətinin mübadiləsi nəzərdə tutulub. Ölkəmizdə fəaliyyət göstərən ali təhsil müəssisələrinin xarici universitetlərlə əməkdaşlığı təhsil sisteminə mühüm töhfələr verib”.
Q.Məhərrəmov sonda təhsilin keyfiyyəti məqsədilə atılan addımların davam etdirilməsindən söz açıb: “Bu addımlar davam etdirilərək, universitetlərdə daha keyfiyyətli kadrların sayı artırılmalı, tədqiqata, tədrisə göstərilən qayğı daha da artırılmalı və infrastruktur buna uyğun yenilənməlidir. Universitetlərin internet şəbəkələşdirilməsi, biznes və sənaye əlaqələrinin, laboratoriyaların, infrastrukturun gücləndirilməsi prosesləri davam etməkdədir. Aparılan bu addımlar təhsildə keyfiyyətin daha da yaxşılaşmasına gətirib çıxaracaq”.
Bölmənin digər xəbərləri
