Alimlər şizofreniya ilə bağlı səkkiz yeni gen aşkar ediblər - ARAŞDIRMA
Bakı, 16 avqust, AZƏRTAC
Kardiff Universitetinin alimləri şizofreniya ilə əlaqəli səkkiz yeni gen müəyyən ediblər.
AZƏRTAC “MedicalXpress” portalına istinadla xəbər verir ki, bu kəşf indiyə qədər aparılan ən böyük ekzom ardıcıllığı araşdırmasının nəticəsidir və xəstəliyin səbəblərini daha yaxşı anlamağa imkan verir.
“Nature Communications” jurnalında dərc olunan araşdırmada şizofreniya diaqnozu qoyulmuş 28 min 898 nəfərin, sağlam 103 min 041 şəxsin və 3 444 ailənin genetik məlumatları təhlil olunub. Nəticədə iki gen – STAG1 və ZNF136 şizofreniya ilə güclü şəkildə əlaqələndirilib. Daha altı gen (SLC6A1, KLC1, PCLO, ZMYND11, BSCL2 və CGREF1) isə orta səviyyəli sübutlarla xəstəliklə bağlıdır.
Alimlər bildirirlər ki, bu genlərdəki mutasiyalar beynin kimyəvi rabitəsini pozaraq xəstəliyin inkişafına səbəb ola bilər. Xüsusilə SLC6A1 və KLC1 genlərindəki dəyişikliklər şizofreniya riskini artıran yeni mutasiya növü kimi müəyyən edilib. Mütəxəssislərə görə, bu tapıntılar şizofreniyanın autizm, epilepsiya və inkişaf geriliyi kimi digər nevroinkişaf pozğunluqları ilə ortaq genetik köklərə malik olduğunu da göstərir. Tədqiqatçılar hesab edirlər ki, bu kəşf gələcəkdə yeni dərmanların hazırlanması və hədəfli müalicələrin inkişafı üçün mühüm addımdır.
Bölmənin digər xəbərləri
