Almaniya F-35 təyyarələri üçün komponentlər istehsal edəcək
Berlin, 3 avqust, AZƏRTAC
Təxminən il yarımdan sonra Almaniyada F-35 qırıcı-bombardmançı təyyarələri üçün komponentlər istehsal edən müəssisənin işə salınması gözlənilir.
AZƏRTAC xəbər verir ki, ilk detallar 2025-ci ilin əvvəlində buraxılacaq. Berlin 35 ədəd çoxfunksiyalı təyyarənin alınması barədə ABŞ-la müqavilə bağlayıb. İndi isə onların komponentlərini də istehsal edəcək. Zavod Şimali Reyn-Vestfaliya torpağında tikilir.
Hərbi texnikaya investisiyaların əhəmiyyəti olduqca böyükdür və bu proqram Almaniya Silahlı Qüvvələrini yenidən təchiz etməyə imkan yaradacaq.
“Dpa” agentliyi qeyd edir ki, yeni “Rheinmetall” müəssisəsində ən azı 400 ədəd F-35 təyyarəsi üçün komponentlər buraxılacaq. Alınacaq 35 təyyarənin “Panavia Tornado” qırıcı-bombardmançılarını əvəz edəcəyi nəzərdə tutulur. Satınalma Bundesverin yenidən təchiz edilməsi üçün 100 milyard avroluq xüsusi fonddan maliyyələşdirilib. Fondun yaradılması Ukraynada müharibənin başlanmasından bir neçə gün sonra elan olunub.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
