Almaniya və Azərbaycan arasında əməkdaşlıq bütün sahələrdə yüksək səviyyədə inkişaf edir ŞƏRH
Bakı, 4 aprel, AZƏRTAC
Azərbaycanın xarici siyasətinin əsas tərkib hissələrindən olan ikitərəfli əlaqələrin qurulması və yeni istiqamətlər üzrə inkişaf etdirilməsi yönümündə atdığı addımların uğurlu nəticələri günümüzün reallıqlarında özünün aydın ifadəsini tapır. Bu baxımdan ölkəmizin Avropa dövlətləri ilə əməkdaşlığa xüsusi önəm verməsi diqqətdən kənarda qalmır. Aprelin 2-də Almaniya Federativ Respublikasının Prezidenti Frank-Valter Ştaynmayerin ölkəmizə rəsmi səfəri bütün bu məqamlara işıq saldı. Almaniya Azərbaycanın Avropada ən vacib siyasi və iqtisadi tərəfdaşlarından biridir. İki ölkə arasında diplomatik münasibətlər 1992-ci ildə qurulub. Ötən dövr ərzində qarşılıqlı səfərlərin dinamikliyi, eyni zamanda, əlaqələrin inkişafında hüquqi baza rolunu oynayan sənədlərin imzalanması fonunda iki ölkə arasında əməkdaşlıq bütün sahələrdə yüksək səviyyədə inkişaf edir. Əməkdaşlıqda iqtisadi amil daim önə çəkilir. Prezident İlham Əliyev Almaniya Prezidenti ilə birgə mətbuata bəyanatında bu məqamı xüsusi vurğuladı ki, iqtisadi sahədə əldə edilmiş nəticələr bizi ruhlandırır. Çünki bu ilin yanvar-fevral aylarında ticarət dövriyyəmiz təxminən üç dəfə artıb. Bunun əsas səbəbi Azərbaycandan Almaniyaya ixrac edilən xam neftin həcminin artması olub. Ona görə gələcək illərdə ticarət dövriyyəmizin şaxələndirilməsi ilə bağlı, xüsusilə bərpaolunan enerji sahəsində daha fəal addımlar atmalıyıq. Xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 giqavata çatdırmaq fikrindəyik və bu, tam realdır, bunun bir hissəsi Avropaya ixrac ediləcək.
Bu fikirləri AZƏRTAC-a açıqlamasında Milli Məclisin deputatı Malik Həsənov bildirib.
Deputat vurğulayıb ki, hazırkı dövrün əsas çağırışlarından birinin məhz bərpaolunan enerji mənbələrinə investisiyaların yatırılması olduğunu nəzərə alsaq, Almaniya ilə Azərbaycan arasında əlaqələrin daha da möhkəmlənməsi üçün yeni imkanların mövcudluğunu əminliklə qeyd edə bilərik: “Azərbaycanın ötən il ev sahibliyi etdiyi, bütün dünyanı Bakıya toplayan COP29 iqlim konfransı ölkəmizin, həmçinin iştirakçı dövlətlərin hansı imkanlara malik olduğunu bir daha açıqladı. Dövlətimizin başçısı İlham Əliyev mətbuata bəyanatında qeyd etdi ki, bu istiqamət üzrə də Almaniya ilə çox fəal əməkdaşlığımız olub. COP29-da 197 ölkəni təmsil edən 77 mindən çox iştirakçı qeydiyyatdan keçdi və bu konfrans böyük, uğurlu nəticələrlə zəngin idi. İştirak etməyən yeganə ölkə Ermənistan oldu. Bu da təəssüf hissi doğurur. Çünki xüsusilə indiki şəraitdə - Azərbaycanla Ermənistan arasında normallaşma prosesinin uğurla getdiyi bir zamanda Ermənistan tərəfinin bu beynəlxalq konfransı boykot etməsi başadüşülən deyildi. Bu məsələdə də Azərbaycanın mövqeyi Almaniya tərəfinə çatdırıldı”.
Malik Həsənov prezidentlərin mətbuata bəyanatlarında, həmçinin jurnalistlərin suallarını cavablandırarkən səsləndirdikləri çağırışlara diqqəti yönəldərək bildirib ki, Azərbaycanın daim ədalətin və beynəlxalq hüququn yanında olması Almaniya rəsmiləri tərəfindən də yüksək dəyərləndirilir: “Ölkəmizin 44 günlük İkinci Qarabağ müharibəsində tarixi Zəfərindən sonra Ermənistana təklif etdiyi sülh müqaviləsi sözügedən səfər çərçivəsində əsas müzakirə mövzularından biri oldu. 30 illik işğal dövrünün reallıqlarına diqqəti yönəldən dövlətimizin başçısı “Azərbaycan 30 il ərzində erməni işğalından əziyyət çəkmişdir. Bizim xalqımız etnik təmizləməyə məruz qalmışdır. Bir milyon azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir” söyləyərək onu da əlavə etdi ki, tarixi Zəfərimiz sülh danışıqlarına yol açdı. Bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşıb. Almaniya Prezidenti son illərdə cərəyan edən hadisələrdən sonra Cənubi Qafqaz regionunun daha sabit bölgəyə çevriləcəyinə əminliyini, sülh müqaviləsinin imzalanması istiqamətində əldə olunan irəliləyişdən məmnunluğunu ifadə etdi. Bildirdi ki, iki dövlət arasında qeyri-sülh dövrünün geridə qalmasını və sabitlik gətirəcək yeni bir gələcəyin yaranmasını istəyirik. Həm Ermənistan, həm də Azərbaycan üçün Cənubi Qafqaz sülhün bərqərar olduğu regiona çevrilməlidir”.
Deputat bildirib ki, ötən dövrdə müxtəlif sahələrdə əməkdaşlığımız, xüsusilə də Prezident İlham Əliyevin son illərdə Almaniyaya səfərləri iki ölkə arasında münasibətləri sürətli inkişaf etdirir: “Almaniya Azərbaycanı postsovet məkanında önəmli tərəfdaş kimi qəbul edir. Ölkəmiz mühüm strateji mövqeyi, zəngin təbii resursları ilə daim dünyanın diqqətindədir. Qərblə Şərqin qovuşuğunda yerləşən Azərbaycan ölkələr, xalqlar arasında körpü roluna daim yeni əlavələr edir. Ölkəmizin hazırkı dövrdə mühüm çağırışları sırasında yeni körpülərin qurulması əsas yer tutur.
Azərbaycanın Avropa İttifaqı, eyni zamanda, quruma üzv olan dövlətlər ilə əməkdaşlığı yüksələn xətlə inkişaf edir. Azərbaycan Prezidenti Almaniyadan olan həmkarına onun ölkəmizə səfərini yüksək dəyərləndirərək bildirdi ki, bu səfərin çox müsbət nəticələri olacaq. İkitərəfli münasibətlərimizin tarixində bu, Almaniya Prezidentinin Azərbaycana birinci rəsmi səfəridir. Səfərin yekunları ölkələrimizi bir-birinə daha yaxın edəcək”.
Bölmənin digər xəbərləri
