Almaniyada bu ilin ən isti günü qeydə alınıb
Berlin, 3 iyul, AZƏRTAC
Almaniya Meteorologiya Xidməti (DWD) iyulun 2-də ölkə üzrə rekord istilərin qeydə alındığını açıqlayıb. Lakin günün sonunda bir çox bölgədə güclü şimşək və leysan yağışları müşahidə olunub.
AZƏRTAC yerli mediaya istinadla xəbər verir ki, Reynland-Pfalts əyalətindəki Andernax hava stansiyasında 39,3 dərəcə ölçülüb. Bu, ölkədə cari il üzrə ən yüksək temperatur olub. Saksoniya-Anhalt bölgəsindəki Tangerhütte-Demker şəhərində 39,2, Bavariyadakı Kitsingen şəhərində isə 39,1 dərəcə temperatur qeydə alınıb.
Brandenburq və Saksoniya əyalətlərinin sərhədində geniş ərazidə meşə yanğını daha da genişlənib. Ərazi əvvəllər hərbi təlim zonası olduğu üçün partlayıcı maddələrlə çirklənmiş hesab olunur ki, bu da yanğının söndürülməsini çətinləşdirir.
Ölkənin qərb hissəsində - Şimali Reyn-Vestfaliya ərazisində isə güclü leysan baş verib. Əyalətin qərbində güclü yağışlar selə səbəb olub. Hava şəraiti nəqliyyatın, o cümlədən dəmir yolunun hərəkətində ciddi maneələr yaradıb. Emsland, Norden və Emden şəhərlərinin əhalisinə hava şəraiti ilə əlaqədar xəbərdarlıq edilib.
Qeyd edək ki, Almaniyada indiyədək istilik rekordu 2019-cu il iyulun 25-də Şimali Reyn-Vestfaliya əyalətindəki Tönisvorst və Duysburq-Baerl stansiyalarında qeydə alınıb - 41,2 dərəcə.
Meteoroloqların proqnozlarına görə, cümə axşamı Almaniyada mərkəzi bölgələrdən cənub-şərqə doğru hərəkət edən yağışlı hava müşahidə olunacaq. Cənub və cənub-şərqdə isə günün sonuna doğru qasırğalı hava şəraiti gözlənilir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
