Almaniyada məcburi hərbi xidmətin bərpasına dair müzakirələr aktuallaşıb
Berlin, 1 aprel, AZƏRTAC
Almaniyada hərbi xidmətin yenidən tətbiqi ilə bağlı müzakirələr intensivləşib.
AZƏRTAC “Tagesschau” informasiya xidmətinə istinadla xəbər verir ki, 2011-ci ildə ləğv edilən məcburi hərbi xidmətin bərpası məsələsi son illərdə gündəmdə olsa da, Rusiya-Ukrayna müharibəsindən sonra bu müzakirələr daha da aktuallaşıb.
Hazırda Almaniya Silahlı Qüvvələrində 100 min nəfərdən çox şəxsi heyət çatışmazlığı var. Bundestaqın Silahlı Qüvvələr üzrə müvəkkili Eva Höql bu problemin həll edilməsinin vacibliyini vurğulayıb. Almaniya Silahlı Qüvvələrinin baş müfəttişi, general Karsten Breuer isə ölkənin müdafiə qabiliyyətinin zəiflədiyini və bunun qarşısını almaq üçün müxtəlif model və variantların nəzərdən keçirildiyini bildirib.
Hökumətdə bu məsələyə dair müxtəlif yanaşmalar mövcuddur. Xristian Birlik partiyaları (CDU/CSU) məcburi hərbi xidmətin mərhələli şəkildə bərpasını təklif edir. Birlik həm kişilər, həm də qadınlar üçün birillik icbari xidmət tətbiqinin vacibliyini vurğulayır. Bu xidmət ya hərbi sahədə, ya da sosial, ekoloji və mədəni təşkilatlarda yerinə yetirilə bilər.
Sosial Demokratlar Partiyası (SPD) isə könüllü əsasda yeni hərbi xidmət modelini müdafiə edir. SPD-nin təklif etdiyi sistemə əsasən, bütün hərbi xidmətə yararlı şəxslər qeydə alınmalı, lakin yalnız ehtiyac olduğu qədər çağırış həyata keçirilməlidir.
Müxalif partiyalar arasında da fərqli mövqelər var. Yaşıllar Partiyası “Azadlıq xidməti” adlı altı aylıq məcburi ictimai xidmət modelini təklif edir. Radikal sağçı Almaniya üçün Alternativ (AfD) partiyası ikiillik hərbi xidmətin bərpasını müdafiə edir. Sol Partiya isə hərbi xidmətin tamamilə könüllülük əsasında həyata keçirilməsini istəyir.
Sorğulara əsasən, Almaniya əhalisinin 58 faizi məcburi hərbi xidmətin bərpasını dəstəkləsə də, 18-29 yaşlı şəxslərin 61 faizi bu ideyanın əleyhinədir. Bu vəziyyət hökumətin qərar qəbul etməsini daha da çətinləşdirir.
Elvin Mövsüm
AZƏRTAC-ın xüsusi müxbiri
Berlin
Bölmənin digər xəbərləri
