Almaniyanın Saksen-Anhalt torpağında da 20 Yanvar şəhidləri yad edilmişdir
Bakı, 26 yanvar (AZƏRTAC). Almaniyanın Saksen-Anhalt torpağında, Maqdeburg şəhərində 130 cəmiyyətin iştirakı ilə “Demokratiyanın yolları” (MEILE DER DEMOKRATIE) mövzusunda tədbir keçirilmişdir.
Diasporla İş üzrə Dövlət Komitəsindən AZƏRTAC-a bildirmişlər ki, tədbirdə Azərbaycan icmasını “Saksen-Anhalt Alman-Azərbaycan mədəniyyət cəmiyyəti” təmsil etmişdir.
İştirakçılar arasında Maqdeburq şəhəri İcra hakimiyyətinin başçısı Lutz Trumper, daxili işlər naziri Holqer Hölmann, siyasi partiyaların (SPD, CSU, CDU, FPD və Yaşıllar partiyası) üzvləri də olmuşlar.
Tədbir çərçivəsində 20 Yanvar faciəsi, Dağlıq Qarabağ münaqişəsi, ermənilərin Azərbaycan ərazilərində törətdikləri vəhşiliklər barədə geniş məlumat verilmiş, sənədli film nümayiş etdirilmiş, şəhidlərin xatirəsi ehtiramla anılmışdır.
“Saksen-Anhalt Alman-Azərbaycan mədəniyyət cəmiyyəti”nin sədri Yaşar Millnitts-Niftəliyev, üzvlərdən Nils Assel, Aleksander Mishalyuk, Silviye Pretzel və başqaları çıxış edərək Azərbaycanın mədəniyyəti, tarixi, iqtisadiyyatı, turizm imkanları, mətbəxi, bugünkü demokratik inkişafı barədə geniş məlumat vermişlər.
İştirakçılara Azərbaycanın Almaniyadakı səfirliyinin göndərdiyi Azərbaycanla bağlı kitablar təqdim olunmuşdur.
Bölmənin digər xəbərləri
