Alternativ enerji mənbələrindən istifadənin əhatə dairəsi genişləndirilir
Bakı, 20 mart (AZƏRTAC). Ekologiya və Təbii Sərvətlər Nazirliyi (ETSN) Azərbaycan Prezidentinin 2004-cü il 21 oktyabr tarixli Sərəncamı ilə təsdiq olunmuş “Azərbaycan Respublikasında alternativ və bərpa olunan enerji mənbələrindən istifadə olunması üzrə Dövlət Proqramı”nın icrası istiqamətində səlahiyyətləri çərçivəsində bir sıra tədbirlər həyata keçirmişdir.
ETSN-dən AZƏRTAC-a verilən məlumata görə, Şahdağda yerləşən Kompleks Hidrometeoroloji və Ekoloji Tədqiqat Elm Mərkəzi və Pirallahı adasındakı hidrometeoroloji stansiya alternativ enerji ilə təmin olunmuşdur.
Alternativ enerji mənbələrindən istifadənin əhali arasında təbliğ olunması məqsədilə ETSN tərəfindən respublikanın dağ kəndlərində pilot layihə çərçivəsində bir neçə bioqaz qurğusu quraşdırılmışdır. Hazırda Şamaxı rayonunun Avaxıl kənd orta məktəbini istilik sistemi ilə təmin etmək üçün bioqaz qurğusunun istifadəyə verilməsi üzrə tamamlama işləri görülür.
Alternativ enerji imkanlarını müəyyənləşdirmək üçün çayların sel xəritəsi tərtib olunmuş, həmçinin Xudat rayonunun ictimai binalarının geotermal su mənbələrinin enerjisindən istifadə etməklə qızdırılması, o cümlədən Danimarkanın Ətraf Mühit Nazirliyi ilə birgə Sumqayıt və Gəncə şəhərlərinin məişət tullantılarından bioqaz alınaraq kiçik elektrik stansiyalarının qurulması üzrə layihələr hazırlanmışdır.
Bölmənin digər xəbərləri
