Altıncı “Yerli şirkətlərin tanıtım sərgisi”ndə məşğulluq xidmətləri də təqdim edilir
Bakı, 19 iyun, AZƏRTAC
Kiçik və Orta Biznesin İnkişafı Agentliyi və “Marsol Group”un birgə təşkilatçılığı, “Kapital Bank”ın rəsmi tərəfdaşlığı ilə keçirilən 6-cı “Yerli şirkətlərin tanıtım sərgisi”nin tərəfdaşlarından biri olan Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi sərgidə ayrıca stendlə təmsil olunur.
Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, dörd gün davam edəcək sərgi çərçivəsində əmək yarmarkaları da təşkil olunur. Həmçinin müraciət edənlərə Agentliyin karyera məsləhətçiləri peşəyönümü məsləhət xidmətləri göstərirlər. Eyni zamanda, işəgötürənlərə onların fəaliyyətlərinin dəstəklənməsinə yönəlmiş xidmətlər barədə məlumat verilir.
Nazirliyin tabeliyindəki DOST İnklüziv İnkişaf və Yaradıcılıq Mərkəzində müxtəlif istiqamətlər üzrə təlimlərə cəlb edilmiş əlilliyi olan şəxslərin əl işləri də sərgidə nümayiş olunur.
“Bakı Ekspo Mərkəzi”ndə keçirilən sərgidə qida, informasiya texnologiyaları, təhsil, inşaat, sənaye, kənd təsərrüfatı, logistika, toxuculuq və digər sahələrdə fəaliyyət göstərən 300-ə yaxın yerli şirkət öz məhsul və xidmətlərini nümayiş etdirir. Sərgi iyunun 21-dək davam edəcək.
Qeyd edək ki, “Yerli şirkətlərin tanıtım sərgisi” yerli şirkətlərin məhsul və xidmətlərinin 6 ildir təqdim edildiyi ən böyük platformalardan biridir. Məqsəd yerli şirkətlərin məhsul və xidmətlərini, xüsusilə də ilk dəfə bazara çıxarılacaq brendləri geniş ictimaiyyətə tanıtmaq, xarici bazarlara çıxış imkanlarını artırmaq və biznes subyektləri arasında qarşılıqlı faydalı əməkdaşlıqları təşviq etməkdir.
Bölmənin digər xəbərləri
