Ankarada “SAHA EXPO” müdafiə sərgisinə hazırlıqdan bəhs edilib
Ankara, 23 avqust, AZƏRTAC
“Oktyabrda İstanbulda keçirilməsi planlaşdırılan dördüncü “SAHA EXPO” müdafiə və aerokosmik sənaye sərgisi Ukraynadakı döyüşlərdə fəal şəkildə istifadə edilən FPV pilotsuz aparatlar da daxil olmaqla, dünyanın ən müasir hərbi avadanlıqlarını nümayiş etdirmək üçün platformaya çevriləcək”.
AZƏRTAC xəbər verir ki, bu fikri “SAHA” İstanbul şirkətinin baş katibi Levent Kerim Uça Ankaradakı ODTÜ Universitetinin texnoloji şəhərciyində keçirdiyi mətbuat konfransında bildirib.
Onun sözlərinə görə, Türkiyənin müdafiə sənayesində beynəlxalq mövqelərini gücləndirməsi İstanbulda keçirilən “SAHA EXPO” sərgisinə marağı artır.
“Əminəm ki, oktyabrda meqapolisdə keçirəcəyimiz sərgi Türkiyənin hərbi-sənaye kompleksində (HSK) yeni sıçrayışın göstəricisi olacaq. Bu, ölkəmizin kosmik sektoruna da aiddir. Sərgilərimiz qlobal müdafiə sənayesinin dinamikasının güzgüsüdür”, - deyə “SAHA” İstanbulun baş katibi bildirib.
O, həm Türkiyədə, həm də xaricdə işlənib hazırlanmış pilotsuz uçuş aparatlarının ziyarətçilərin xüsusi marağına səbəb olacağını istisna etməyib.
Baş katib xatırladıb ki, “SAHA EXPO” müdafiə və aerokosmik sənaye sərgiləri 2018-ci ildən Türkiyədə keçirilir və bu müddət ərzində özünü hərbi-sənaye kompleksinin yeni məhsullarının nümayişi üçün Avropanın ən böyük platformalarından biri kimi təsdiqləyib.
“Biz qarşıdan gələn sərgidə 150 min ziyarətçinin olacağını gözləyirik, bağlanmış müqavilələrin həcmi isə 2 milyard dolları keçə bilər. Əgər əvvəlki illərdə sərgi dörd gün davam edirdisə, bu il biz müddəti beş günə – oktyabrın 22-dən 26-na qədər artırmağı planlaşdırırıq”, - deyə o qeyd edib.
ODTÜ Universitetinin idarə heyətinin üzvü, professor Ahmet Yozqatlıgil də “SAHA EXPO”nun əhəmiyyətindən danışıb.
Onun sözlərinə görə, müasir Türkiyə müdafiə təyinatlı məhsulların ixracını artıran və bu sahədə özünü təmin edən dövlətdir.
O xatırladıb ki, 2023-cü ilin sonuna olan məlumata görə, Türkiyənin müdafiə məhsullarının ixracı 5,5 milyard dollara çatıb.
Ramin Abdullayev
AZƏRTAC-ıs xüsusi müxbiri
Ankara
Bölmənin digər xəbərləri
