Antonio Quterreş minatəmizləmə fəaliyyətini gücləndirmək üçün qlobal kampaniya təşəbbüsü irəli sürüb
Bakı, 17 iyun, AZƏRTAC
BMT-nin Baş katibi tərksilah və minalarla mübarizəyə dəstəyi artırmaq üçün qlobal kampaniyaya başlamağa hazırlaşır.
AZƏRTAC təşkilatın məlumatına istinadla xəbər verir ki, Antonio Quterreş bu addımı iyunun 16-da verdiyi bəyanatda BMT-nin bir neçə üzv dövlətinin Piyadalara Qarşı Mina Qadağası Konvensiyasından çıxmaq planlarına cavab olaraq bildirib. Ottava Konvensiyası kimi də tanınan 1997-ci il müqaviləsi bu silahların istifadəsi, yığılması, istehsalı və ötürülməsini qadağan edir.
BMT-nin Tərksilah Məsələləri üzrə Ofisinə (UNODA) görə, həmin vaxtdan bəri bu, piyada əleyhinə minaların qlobal istehsalında faktiki olaraq dayanmağa və onların yerləşdirilməsinin kəskin azalmasına səbəb olub, eyni zamanda, 40 milyondan çox ehtiyatda olan mina məhv edilib. Bu günə qədər 165 dövlət müqavilənin iştirakçısıdır və onların 133-ü onu imzalayıb.
Beş Avropa ölkəsi - Estoniya, Finlandiya, Latviya, Litva və Polşa bu yaxınlarda Rusiya ilə bağlı təhlükəsizlik narahatlıqlarına görə Konvensiyadan ayrılmaq niyyətində olduqlarını və ya bu istiqamətdə addımlar atdıqlarını bəyan ediblər.
Baş katib ölkələrin adlarını çəkmədən hadisələrin bu cür inkişafından ciddi narahat olduğunu bildirib. O qeyd edib: “Mülki əhalinin genişlənən münaqişələr səbəbindən artan risklərlə üzləşdiyi bir vaxtda biz insan həyatını və ləyaqətini qoruyan çərçivələri gücləndirməliyik. Son bəyanatlar xüsusi narahatlıq doğurur, çünki bu, mülki müdafiəni zəiflətmək və saysız-hesabsız insan həyatını xilas edən iyirmiillik normativ çərçivəni pozmaq riski daşıyır”.
Antonio Quterreş bütün dövlətləri humanitar tərksilah müqavilələrinə əməl etməyə və onlardan çıxmaq istiqamətində hər hansı addımı dərhal dayandırmağa çağırıb. O, həmçinin bildirib ki, hələ də müqaviləyə qoşulmayan 32 dövlət gecikmədən bu addımı atmalıdır. Həmin ölkələrə Çin, İran, İsrail, Rusiya və ABŞ da daxildir.
Bölmənin digər xəbərləri
