Araşdırma: Bağırsaq bakteriyaları və yuxusuzluq arasında əlaqə tapılıb
Bakı, 14 avqust, AZƏRTAC
Yeni bir araşdırma göstərir ki, bəzi bağırsaq bakteriyaları yuxusuzluq riskini artıra və ya azalda bilər.
AZƏRTAC “MedicalXpress” portalına istinadla xəbər verir ki, “General Psychiatry” jurnalında dərc olunan tədqiqat Mendel randomizə üsulundan istifadə edərək genetik məlumatlar üzərində aparılıb.
Tədqiqatda 386 min 533 nəfərin yuxusuzluqla bağlı genom məlumatları, həmçinin MiBioGen alyansı və Hollandiya Mikrobiom Layihəsindən əldə olunan 26 mindən çox insanın bağırsaq mikrobiomu nümunələri analiz edilib.
Nəticədə 14 bakteriya qrupu yuxusuzluqla müsbət əlaqəli olub (yəni riski 1-4 faiz artırır). 8 bakteriya qrupu isə mənfi əlaqəli olub (riski 1-3 faiz azaldır). Yuxusuzluq bəzi bakteriyaların azalmasına (43-79 faiz), bəzilərinin isə çoxalmasına (65 faizdən 4 dəfədən çox) səbəb olur. Xüsusilə Odoribacter bakteriyası yuxusuzluq riski ilə güclü şəkildə əlaqələndirilib. Alimlər qeyd edirlər ki, tapıntılar səbəb-nəticə əlaqəsini göstərən ilkin sübutlar təqdim edir. Lakin araşdırma yalnız Avropa mənşəli iştirakçılar üzərində aparıldığı üçün nəticələr bütün xalqlara aid edilə bilməz. Həmçinin qidalanma, həyat tərzi və ətraf mühit faktorları nəzərə alınmayıb.
Tədqiqatçılar bildirirlər ki, bağırsaq mikrobiomu və yuxusuzluq arasındakı iki istiqamətli əlaqə immun sistem, iltihab prosesi və beyin kimyası kimi mexanizmlərlə bağlı ola bilər.
Bölmənin digər xəbərləri
