Araşdırma: Yataqda telefona sərf olunan hər saat yuxusuzluq ehtimalını təxminən 60 faiz artırır
Bakı, 2 aprel, AZƏRTAC
Norveçdə 45 min 202 gənc arasında aparılan araşdırma nəticəsində məlum olub ki, yataqda sosial şəbəkələrdəki lentləri vərəqləmək yuxusuzluq riskini 59 faiz artırır, yuxu müddətini isə 24 dəqiqə azaldır. AZƏRTAC bu barədə xarici mediaya istinadla xəbər verir.
“Frontiers of Psychiatry” jurnalında dərc edilən araşdırmada səbəb-nəticə əlaqəsi – məsələn, smartfondan istifadənin yuxusuzluğa səbəb olub-olmaması müəyyən edilməsə də, alimlər aşkar ediblər ki, gecələr yataqda smartfondan istifadə daha az yatmaq ehtimalını əhəmiyyətli dərəcədə artırır. Yuxusuzluqdan əziyyət çəkən və ya kifayət qədər yuxu almayan insanlarda ürək xəstəlikləri, yüksək qan təzyiqi, şəkərli diabet və digərləri də daxil olmaqla bir sıra xroniki xəstəliklərin inkişaf riski daha yüksəkdir.
“Zamanla yuxunun azaldılması yuxu borcunun artmasına, yorğunluq, idrak qabiliyyətinin azalması və psixi sağlamlıq problemləri riskinin artmasına səbəb ola bilər. Artıq kifayət qədər olmayan yuxuya meyilli olan gənclər üçün gecəyə demək olar ki, yarım saatlıq yuxunun itirilməsi bir neçə həftə və ya ay ərzində əhəmiyyətli ola bilər”, - deyə tədqiqatın müəllifi Börqe Sivertsen bildirib.
Bölmənin digər xəbərləri
