Argentinada uşaq əməyinin davamlı olaraq aradan qaldırılması üzrə IV qlobal konfrans keçirilib
Bakı, 15 noyabr, AZƏRTAC
Argentinada uşaq əməyinin davamlı olaraq aradan qaldırılması üzrə IV qlobal konfrans keçirilir. Argentina hökuməti və Beynəlxalq Əmək Təşkilatının birgə təşkilatçılığı ilə noyabrın 14-dən 16-dək keçirilən tədbirdə Azərbaycanın Ailə, Qadın və Uşaq Problemləri üzrə Dövlət Komitəsinin Aparat rəhbəri Ceyran Rəhmətullayeva iştirak edir.
Dövlət Komitəsindən AZƏRTAC-a bildiriblər ki, konfransın ilk günündə Aparat rəhbəri “Hər kəs üçün təhsil” panelində iştirak edərək, Azərbaycanda dövlətimizin başçısının rəhbərliyi ilə uşaqlarla bağlı həyata keçirilən sosial müdafiə və pulsuz təhsil imkanları, o cümlədən ucqar bölgələrdə təhsilin keyfiyyət və əlçatanlığı barədə məlumat verib. Eyni zamanda, Heydər Əliyev Fondu tərəfindən gerçəkləşdirilən yeni məktəb layihələri diqqətə çatdırılıb.
Bundan əlavə, Ceyran Rəhmətullayeva konfransın təhsil panelinin rəhbəri, BBC-nin jurnalisti xanım Nomia İqbal ilə görüşüb, Azərbaycan barədə ətraflı məlumat verib. Nomia İqbal BBC-nin London ofisində qadın və uşaqlarla bağlı ölkələrdən xüsusi reportajlar hazırlayır. Aparat rəhbəri C. Rəhmətullayeva Ermənistan-Azərbaycan, Dağlıq Qarabağ münaqişəsi, Xocalı faciəsi zamanı qətlə yetirilən qadın və uşaqlar, hətta atəşkəs dövründə öldürülən dinc azərbaycanlı qadın və uşaqlar barədə də danışıb. Qeyd edilib ki, 2018-ci ildə Azərbaycan qadınlarının Şərqdə ilk dəfə olaraq səsvermə hüququ qazanmasının 100 illiyi olacaq. Bu məqsədlə də reportaj hazırlamaq üçün BBC-i müxbirini Azərbaycana dəvət edib.
Nomia İqbal bildirib ki, Azərbaycan onun üçün maraqlı ölkədir və ölkəmiz ilə dostluq münasibətlərini qeyd edib.
Noyabrın 15-də Paraqvayın sosial müdafiə nazirinin rəhbərlik etdiyi paneldə Azərbaycanda uşaqların sosial müdafiəsi və sosialyönümlü dövlət proqramları barədə məlumat verilib.
“Sosial müdafiə” panelində Argentinanın sosial müdafiə naziri xanım Karolina Staley ölkəsində ana və uşaqların sosial müdafiəsi sahəsində atılan müsbət addımları və bu istiqamətdə nailiyyətləri qeyd edib.
Konfrans, əsasən analıq məzuniyyətinin verilməsi məsələləri, ödənişli analıq məzuniyyətinin müddətinin artırılması və qeyri-formal sektorda, özəl sektorda işləyən qadınların analıq məzuniyyəti məsələlərində olan problemlərin həllinə istiqamətlənib.
Tədbir çərçivəsində erkən uşaqlıq dövrü üzrə milli inkişaf planı hazırlanıb və qəbul edilib.
Konfrans çərçivəsində Aparat rəhbəri C.Rəhmətullayeva Argentina televiziyasına müsahibə verərək, konfrans barədə təəssüratlarını bölüşüb. O, eyni zamanda, Azərbaycanın 20 faiz ərazisinin Ermənistan tərəfindən işğal edilməsi barədə məlumat verib, bunun nəticəsində öz yurd-yuvasını tərk etmək məcburiyyətində qalan qaçqın və məcburi köçkün qadın və uşaqların olduğunu qeyd edib. Aparat rəhbəri Azərbaycanın müharibə vəziyyətində olmasına baxmayaraq, ölkədə sosial siyasət sahəsində irəliləyişlərin olduğunu bildirib.
Bölmənin digər xəbərləri
