ATU-nun professorundan koronavirusla mübarizəyə dəstək
Bakı, 25 mart, AZƏRTAC
Azərbaycan Tibb Universitetinin (ATU) ağız və üz-çənə cərrahiyyəsi kafedrasının müdiri, professor Çingiz Rəhimov koronavirus pandemiyasına qarşı mübarizə kampaniyası çərçivəsində təşəbbüslə çıxış edib.
40 ildən artıqdır peşəkar fəaliyyətlə məşğul olan doktor Ç.Rəhimov, bir il öncə yaratdığı “EcoDent” klinikasında olan süni ventilyasiya aparatını koronavirusa yoluxan xəstələrin müalicəsində istifadə olunması üçün ixtisaslaşmış xəstəxanalara təqdim edib.
AZƏRTAC xəbər verir ki, Çingiz Rəhimov bu barədə fikirlərini bölüşərək deyib: “Klinikamız ən müasir avadanlıqla təchiz olunub. İşçi heyətinin peşəkarlığını və müvafiq avadanlığın mövcudluğunu nəzərə alaraq, Səhiyyə Nazirliyi ölkəmizdə ilk dəfə olaraq cərrahi əməliyyatları və stomatoloji xidməti ambulator şəraitdə, ümumi ağrısızlaşdırma (narkoz) altında aparılmasına icazə verib. Bu da bizi digər stomatoloji müəssisələrdən fərqləndirir”.
Onun sözlərinə görə, digər özəl tibb müəssisələri də ölkə Prezidentinin təşəbbüsünə qoşulmalı və koronavirusla mübarizədə əlindən gələni əsirgəməməlidir: “Hazırda bütün dünya və ölkəmiz ciddi ağ ciyər ağırlaşmalarına səbəb olan koronavirus pandemiyası ilə qarşılaşıb. Böyük xəstə axını olduğu təqdirdə, ağ ciyərin süni ventilyasiyası aparatlarının çatışmazlığı ilə üzləşə bilərik. Buna görə də, tam işlək vəziyyətdə olan süni ventilyasiya aparatını, bu işə cəlb olunmuş təşkilatların göstərişinə əsasən lazımi xəstəxanaya təqdim etmişəm”.
Bölmənin digər xəbərləri
