Bakı, 23 fevral, AZƏRTAC

Avropa İttifaqı (Aİ) Ermənistana himayədarlıq etməklə bölgəyə sülhün gəlişini əngəlləyir. Halbuki, Aİ daha əvvəl Azərbaycanla Ermənistan arasında sülh müqaviləsinin imzalanması üçün təşəbbüs göstərərək münasibətlərin tənzimlənməsinə töhfə vermək istədiyini nümayiş etdirmişdi. Amma Fransa Prezidenti Emmanuel Makronun Nikol Paşinyana olan “sevgisi” Avropa İttifaqının tərəfdaşlıq missiyasına da kölgə saldı. Azərbaycanın razılığı olmadan Aİ-nin Ermənistana müşahidəçi missiyasının göndərilməsi regionda sabitliyin pozulmasına səbəb olacağı dəfələrlə bəyan edilmişdi. Bununla yanaşı, Münxen Təhlükəsizlik Konfransı (MTK) çərçivəsində ABŞ-nin Dövlət katibi Antoni Blinken keçirilən üçtərəfli görüşdə də Qərbin Azərbaycanla Ermənistan arasında münasibətlərin normallaşmasına töhfə verməyə davam edəcəyini bildirsə də, reallıqda hadisələrin inkişafı tamamilə başqa mənzərə yaradır.

Bu fikirləri Milli Məclisin deputatı Azər Badamov AZƏRTAC-a açıqlamasında söyləyib.

Onun fikirlərinə görə, Avropa İttifaqının müşahidəçi missiyasının Ermənistana göndərilməsinin məqsədi də yavaş-yavaş məlum olur. İlkin olaraq bu missiyanın tərkibinin mülki şəxslərdən ibarət olacağı bəyan edilsə də, nəticədə heç də belə olmadı. Yəni, Aİ özü etiraf edərək Ermənistana göndərilən missiyanın 50 faizinin silahsız müşahidəçilər olduğunu bildirir. Bu da missiya üzvlərinin digər 50 faizinin silahlılardan ibarət olduğunu sübuta yetirir. Sual yaranır, Avropa İttifaqının missiyanın tərkibində silahlıların göndərilməsində məqsədi nədir? Təbii ki, bunun bir cavabı var. Ermənistanı yenidən müharibəyə ruhlandırmaq.

“Aİ-nin monitorinq qrupu fəaliyyətə başladıqdan qısa müddət sonra Ermənistan tərəfindən atəşkəsin pozulması da missiyanın əsl məqsədinə aydınlıq gətirir. Bu aydınlıq sərhəddə və Rusiya sülhməramlılarının məsuliyyət zonasında olan ərazilərdən mövqelərimiz yenidən atəşə tutulmaqla başlandı. Belə ki, Aİ-nin silahlı missiyası fəaliyyətə başlayanda Ermənistan Naxçıvan Muxtar Respublikasının Sədərək rayonu və Kəlbəcər rayonunun Təzəkənd məntəqəsi, Şuşa şəhəri və Xocavənd rayonu istiqamətində atəşkəsi pozaraq Azərbaycanın bu təxribata reaksiyasının necə olacağını öyrənməyə qərar veriblər. Azərbaycanın reaksiyası bəllidir. Yəni, ölkəmizə qarşı hər bir təxribat cəhdinə artıqlaması ilə cavab verilir. Amma bu heç də cavab atəşi ilə yekunlaşacağı anlamına gəlmir. Çünki Azərbaycan öz ərazilərində məskunlaşan separatçıların davamlı təxribatlarına səbir nümayiş etdirməyəcək”,-deyə A.Badamov vurğulayıb.

Deputat əlavə edib ki, ermənilərin təxribatları davamlı olacağı halda Azərbaycanın müzəffər Ordusuna antiterror əməliyyatının keçirilməsi ilə bağlı yeni əmr verilə bilər. Əgər ermənilər Azərbaycan Ordusunun Rusiya sülhməramlılarının yerləşdiyi ərazilərdə antiterror əməliyyatına başlamayacağını düşünürlərsə, bu tamamilə yanlışdır. BMT Nizamnaməsinə görə də hər bir ölkə sabitliyin təmini məqsədilə öz ərazisini terrorçulardan təmizlənmək üçün güc tətbiq edə bilər. Ermənistan E.Makronun cızdığı plan üzrə regiona gəlmiş Avropa İttifaqının missiyasına çox da güvənməsin. Çünki Ermənistan tərəfindən bu cür təxribat əməlləri davam etdirilərsə, “Dəmir yumruq” yerindədir və hər an yenidən fəaliyyətə başlaya bilər.

O deyib: “Azərbaycan xalqı sülh və əməkdaşlıq istəyir. Amma sülhün yaranmasına mane olan qüvvələrin himayədarlığı ilə yenidən təxribatların baş verməsi və müharibə riski olacağı təqdirdə Azərbaycan Ordusunun silaha sarılaraq düşməni darmadağın etmək əzmi də çox yüksəkdir. Ordumuz döyüş meydanında qəhrəmanlıq nümayiş etdirərərk torpaqlarımızı işğaldan azad edib və Qələbəyə imza atıb. Tələb olunarsa Ordumuz yenə də öz döyüş əzmini nümayiş etdirməyə və torpaqlarımızı separatçı ünsürlərdən təmizləməyə hazırdır”.