Avropa İttifaqı Ermənistanı beynəlxalq humanitar normalardan irəli gələn öhdəliklərə əməl etməyə çağırıb
Brüssel, 16 dekabr, AZƏRTAC
Avropa İttifaqı Xarici Fəaliyyət Xidməti erməni silahlı qüvvələri tərəfindən girov götürülmüş azərbaycanlılar Dilqəm Əsgərov və Şahbaz Quliyevin qanunsuz mühakiməsi ilə bağlı mövqeyini açıqlayıb.
AZƏRTAC “Eunews.az” portalına istinadən xəbər verir ki, Avropa İttifaqı Ermənistanı beynəlxalq humanitar normalardan irəli gələn öhdəliklərə əməl etməyə və Beynəlxalq Qızıl Xaç Cəmiyyəti ilə əməkdaşlığa çağırıb. Xarici Fəaliyyət Xidməti bunun Azərbaycan, Rusiya və Ermənistan prezidentlərinin 2010-cu il Həştərxan bəyanatına, eləcə də 2014-cü ilin dekabrında Bazeldə keçirilmiş ATƏT-in 21-ci Nazirlər Şurasının iclasında iştirakı çərçivəsində Minsk qrupunun həmsədrlərinin çağırışına uyğun olacağını xatırladıb.
Bu bəyanat vasitəsilə Avropa İttifaqı bir daha azərbaycanlı məcburi köçkünlərin girov götürülməsi məsələsində Ermənistanın birbaşa iştirakını təsdiqləyib.
Pərvanə Qarayeva
AZƏRTAC-ın xüsusi müxbiri
Brüssel
Bölmənin digər xəbərləri
