Avropa Parlamenti onsuz da mürəkkəb olan geosiyasi vəziyyəti gərginləşdirməklə məşğuldur
Bakı, 16 aprel, AZƏRTAC
Avropa Parlamenti son illər ara qızışdırmaq, sülhün bərqərar olmasına maneə yaratmaq, heç bir əsası olmayan məsələləri gündəmə gətirməklə onsuz da mürəkkəb olan geosiyasi vəziyyəti gərginləşdirməklə məşğuldur.
Bu fikirləri Milli Məclisin deputatı Fuad Muradov Avropa Parlamentinin qondarma “erməni soyqırımı” ilə bağlı qəbul etdiyi qətnaməyə münasibət bildirərkən deyib.
F.Muradov deyib ki, bu qətnamənin qəbulunda məqsəd Türkiyənin və Azərbaycanın yerləşdiyi regionu gərginlikdə saxlamaqdır.
Deputat deyib: “Bir il bundan əvvəl istər Avronest Parlament Assambleyasında, istərsə də Avropanın digər qurumlarında ermənilərin belə bir fikri var idi ki, qondarma soyqırımının “100 illiyi” ilə bağlı tədbirlər keçirsinlər. Biz isə Avropa deputatlarına öz fikirlərimizi bildirərək dedik ki, Xocalı faciəsini, 1 milyondan artıq azərbaycanlının qaçqın və məcburi köçkün vəziyyətində yaşamasını, Ermənistanın ikiüzlü siyasətini bir kənara qoyaraq siz tarixi bəlli olmayan bir məsələni qabardırsınız”.
Qeyd edilib ki, bu qətnamə planlaşdırılmış, xüsusi olaraq Türkiyəyə qarşı aparılan işlərin nəticəsidir. Onun qəbulunda əsas məqsəd tarixi məsələni gündəmə gətirmək deyil. Məqsəd Türkiyəyə qarşı təzyiq vasitəsi əldə etməkdir. Qətnamə simvolik xarakter daşıyır və Türkiyə onun icrası ilə bağlı heç bir iş görməyəcək. Avropa Parlamenti ümumi olaraq hansısa fakta əsaslanmamış “tarixi hadisə”yə qiymət vermək istəyir.
Bölmənin digər xəbərləri
