Avropanın idman federasiyaları Ermənistanın “bayraq terroruna” qarşı ədalətli qərar qəbul etməlidirlər
Bakı, 18 aprel, AZƏRTAC
Bir neçə gün əvvəl Ermənistanın paytaxtı İrəvanda keçirilən ağır atletika üzrə Avropa çempionatının açılış mərasimində baş verən barbarlıq ermənilərin faşist xislətini bir daha dünyaya nümayiş etdirdi. Mərasim zamanı Azərbaycan Bayrağı səhnəyə gətirilərkən Ermənistan İctimai Televiziyasının stilisti, tanınmış dizayner, tədbirin təşkilatçılarından olan Aram Nikolyanın qaçaraq, qızın əlindən bayrağımızı qapıb və onu yandırması bu millətin faşistlərdən də qəddar olmasından xəbər verir. Aram Nikolyan saxlanılaraq polis bölməsinə aparılsa da, qısa müddətdən sonra azad edilib. Polis bölməsinin qarşısına onu dəstəkləmək üçün yığışan ermənilər Nikolyanı “qəhrəman” kimi alqışlarla qarşılayıblar. Göründüyü kimi, bir neçə ay əvvəl Tehranda Azərbaycanın İrandakı səfirliyinə silahlı basqın edən quldur da görüntü xatirinə polisə aparılmış, sonradan ruhi xəstə adı ilə buraxılmışdı. “Ruhi xəstə” isə televiziya kanallarına sərbəst müsahibə verərək törətdiyi terror hücumu barəsində rahatlıqla danışırdı. Erməni terrorçusu da başqa dövlətin - Azərbaycanın Bayrağını yandırmaqla özünü qəhrəman kimi göstərib. Hayastanla qardaşlaşan İranın oxşar hərəkətləri cavabsız qalmayacaq. Mütləq bunun layiqli cavabını alacaqlar.
Bu fikirləri siyasi şərhçi Əliqismət Bədəlov AZƏRTAC-a açıqlamasında bildirib.
O deyib ki, bütövlükdə Avropanın idman federasiyaları da ikili standartlar mərəzinə tutulub. Bir sıra idman federasiyaları idmanı siyasi alver meydanına çevirib. Ermənipərəstlər idmandan da siyasi məqsədlər üçün istifadə edirlər. Görünür, Azərbaycanın Vətən müharibəsində işğalçı Ermənistan ordusunu darmadağın etməsi avropalı ermənipərəst diplomatlarla yanaşı, bəzi idman federasiyalarının rəhbərlərini də yandırıb-yaxır: “Biz dəfələrlə UEFA turnirlərində “Qarabağ” futbol komandasına qarşı təxribatların, oyun zamanı hakimlərin ədalətsizliyinin şahidi olmuşuq. Bu dəfə ağır atletika üzrə Avropa birinciliyi zamanı erməni vəhşiliyinin şahidi olduq. Ermənilər çox yaxşı bilirlər ki, Azərbaycan idmançıları nəinki Avropanın, hətta dünyanın ən güclülərindəndir və bu yarışlarda da azərbaycanlı idmançılar mütləq çempion olacaq və İrəvanda Azərbaycanın Dövlət Himni səsləndiriləcək və himnimizi ayaq üstə dinləmək məcburiyyətində olacaqlar. Bir neçə il əvvəl də belə olmuşdu. Cüdoçularımızdan biri İrəvanda keçirilən beynəlxalq turnirdə çempion olaraq Azərbaycanın Dövlət Himnimizin səsləndirilməsinə nail olmuşdu”.
Ə.Bədəlov bildirib ki, Ermənistanda hələ də Vətən müharibəsindəki rüsvayçı məğlubiyyəti həzm edə bilmirlər. Bu yarışdakı qələbəmiz də Qələbə seriyalarının davamı olacaqdı. Ermənilər hələ də dərk edə bilmirlər ki, idman dostluq, əməkdaşlıq, sülh, əmin-amanlıqdır. Amma onlar idmandan da çirkin məqsədlər naminə istifadə edirlər. Bu, biabırçılıq, həm də Ermənistanın beynəlxalq səviyyəli idman yarışı keçirmək iqtidarında olmadınğından xəbər verir. “Mən həm də bu yarışı keçirən Avropa Ağır Atletika Federasiyasını (AAAF) qınayıram. Söz yox ki, AAAF ötən gün Ermənistanın paytaxtı İrəvanda Avropa çempionatının açılış mərasimində Azərbaycan Bayrağının yandırılmasını qəti şəkildə pisləyib, bu barədə bəyanat da yayıb. Ancaq məsələ bununla bitmir. Federasiya daha qətiyyətli qərar qəbul etməli idi. Ən azı yarış yarımçıq dayandırılmalı və ya nəticələr ləğv edilməli, Ermənistan ciddi cəzalandırılmalı idi. Bu vaxta qədər Ermənistanın işğalçılıq siyasəti ilə bağlı əksər nüfuzlu beynəlxalq təşkilatlar çoxlu sayda bəyanatlar verib, qətnamələr qəbul ediblər. Ermənistan bunların hansından nəticə çıxardı ki, Avropa Ağır Atletika Federasiyasının da bəyanatından nəticə çıxarsın?”, - deyə Ə.Bədəlov qeyd edib.
Siyasi şərhçi 2015-ci ildə birinci Avropa Oyunları zamanı Bakıda baş vermiş bir hadisəni xatırladaraq deyib ki, həmin yarışlarda Ukrayna komandasının tərkibində çıxış edən erməni əsilli idmançı mükafata layiq yer tutmuşdu. İdmançıların mükafatlandırılması zamanı Prezident İlham Əliyev medalı erməni idmançının boynundan asmağa hazırlaşarkən, zalda səs-küy yarandı. Ancaq Prezidentin əlinin bir işarəsi ilə zalda tam sakitlik yarandı və erməni əsilli idmançı mükafatına sahib çıxdı. Təbii ki, Prezident İlham Əliyevin bu jesti həm dövlət başçılarına, həm də beynəlxalq idman yarışlarına ev sahibliyi edən ölkələrin başçılarına nümunə olmalıdır. Əslində, Ermənistanın baş naziri də Azərbaycan Bayrağını yandırmaqla beynəlxalq miqyaslı yarışı pozan erməniyə cəza verməklə jest etməli idi. Ancaq bu jesti Nikol Paşinyandan gözləmək olmaz: “Bizdə bir el məsəli var: Başçısı gülüm olanın, başına külüm olar. Rəhbəri Nikol Paşinyan olan ölkənin vətəndaşları da belə xain və faşist xislətli insanlar olmalıdırlar.
“Ermənistan 2015-ci ildə Bakıda keçirilən birinci Avropa Oyunlarına 25 idmançı ilə qatılmışdı. Həmin yarış zamanı onlar Bakıda hər hansı xoşagəlməz insidentlə qarşılaşmadılar. Bu, Azərbaycanın beynəlxalq idman yarışlarına yüksək səviyyədə ev sahibliyi etməsinin növbəti nümunəsi idi. Ermənistanda isə təşkil olunan beynəlxalq idman yarışının açılışı zamanı iştirakçı dövlətdən birinin bayrağının yandırılması bu ölkənin terroru dəstəklədiyi tarixi hadisədir. Bu, ondan xəbər verir ki, Ermənistanın öz ərazisində hər hansı beynəlxalq səviyyəli, o cümlədən idman yarışını təhlükəsiz təşkil edə biləcəyi şübhə doğurur. Beynəlxalq idman təşkilatları qətiyyət nümayiş etdirməli, bundan sonra Ermənistanda hər hansı mötəbər yarışın təşkilindən imtina etməlidirlər”, - deyə Ə.Bədəlov bildirib.
Bölmənin digər xəbərləri
