Ayan Qazi: Diplomu İsveç Kralının şəxsən mənə təqdim etməsi unudulmaz hadisədir MÜSAHİBƏ
Stokholm, 19 iyun, Nərgiz Cəfərli, AZƏRTAC
İsveçdə yaşayan 23 yaşlı azərbaycanlı Ayan Qazi “Dəyərlərə əsaslanan liderlik” proqramını uğurla başa çatdırdığına görə Kral XVI Karl Qustavın şəxsən ona təqdim etdiyi diploma layiq görülüb.
Ötən həftə Ayan Qazi, həmçinin Avropanın ən qədim və daha mötəbər ali təhsil ocaqlarından biri olan, 1666-cı ildə təsis edilmiş Lund Universitetinin “Əmək hüququ” ixtisası üzrə bakalavr diplomunu alıb. Bu, onun ikinci diplomudur; gənc azərbaycanlı qız bundan əvvəl “Xidmət sahəsində idarəçilik” ixtisası üzrə bakalavr təhsili alıb.
Ayan İsveçə 11 yaşında köçüb. Yad dili və mədəniyyəti olan bir ölkədə yerləşən bir çox başqaları kimi, gənc qız da çətinliklərlə üzləşib, amma həm də maksimum dərəcədə istifadə etməyə çalışdığı yeni imkanlar əldə edib.
AZƏRTAC-ın müxbiri ilə söhbətində Ayan fəal tələbə həyatı və ictimai dəyişikliklərə töhfə vermək səyləri barədə danışıb.
– Ayan, belə əlamətdar nailiyyətə görə sizi təbrik edirik. Diplomu şəxsən Kralın təqdim etməsi zamanı hansı hissləri keçirdiniz?
– Diplomu İsveç Kralının şəxsən təqdim etməsi mənim üçün unudulmaz hadisədir. Bu diplom kurs zamanı əldə etdiyim bilik və təcrübənin təsdiqi olmaqla yanaşı, həm də mənim bütün çoxillik ictimai fəaliyyətimin rəsmi təqdiri idi. Eyni zamanda, həm bugünkü məzun, həm də bir vaxtlar xarici ölkəyə köçmüş 11 yaşlı qız üçün simvolik və emosional bir an oldu.
– “Dəyərlərə əsaslanan liderlik” proqramı haqqında ətraflı məlumat verərdiniz.
– Bu təhsil proqramı İsveç Kralının “Gənc liderlik” Fondunun dəstəyi ilə İsveç Skautlar Xalq Məktəbi tərəfindən həyata keçirilir. Tələbə təşkilatının sədri qismində fəaliyyətim sayəsində kursa dəvət almışam. Təlim könüllü liderlik sahəsində ən azı iki il təcrübəyə malik və daha böyük ictimai məsuliyyət götürmək arzusunda olan 20-25 yaşlı gənclər üçün nəzərdə tutulub. Proqrama dörd həftəsonu təhsil, ev tapşırığı və müəllimlərlə görüşlər daxildir. Hər il 24 iştirakçıdan ibarət üç qrup olur və təxminən 70 gənc lider Kralın əlindən diplom alır. Proqram gənc liderlərin İsveç cəmiyyətinə verdiyi töhfələri dəstəkləmək və qeyd etmək üçün yaradılıb.
– İctimai fəallığınız necə başladı?
– Mən belə deyərdim: tələbə həyatı təkcə akademik uğurdan deyil, həm də universitetin həyatında fəal iştirakdan ibarətdir. Mənim iştirakım təhsilin birinci ilində başladı – “Agora” tələbə birliyində layihə meneceri oldum. Növbəti il təhsil məsələlərinə məsul şəxs seçildim və burada fakültə rəhbərliyi ilə dialoqda tələbələrin maraqlarını təmsil etdim. Eyni zamanda, vitse-prezidentin vəzifələrini icra edirdim ki, bu da mənə universitet səviyyəsində üzərimə daha böyük məsuliyyət götürmək və irimiqyaslı layihələrə rəhbərlik etmək imkanı verirdi. Üçüncü il tələbə birliyi seçki komissiyasının sədri oldum və orada bütün vəzifələrə namizədlərin seçilməsi prosesinə rəhbərlik etdim. Bundan əlavə, bələdiyyə ilə əlaqəli başqa bir tələbə təşkilatının sədri idim, onun məqsədi universitetlə yerli biznes arasında körpü yaratmaqdı. Məhz bu könüllü fəaliyyət sayəsində “Dəyərlərə əsaslanan liderlik” kursuna qəbul olundum.
- Gələcəklə bağlı planlarınız nədən ibarətdir?
– İndi özümü inkişaf etdirməyə davam edirəm – təhsil alıram, yeni bilik və bacarıqlar əldə edirəm. Bu diplom mənim üçün başlanğıcdır. Məqsədim dəyərlərimə uyğun şəkildə yaşayan insan və məsuliyyətli vətəndaş olmaqdır. Kim bilir, bəlkə də bir gün eyni məqsəd və əqidəni paylaşan insanlarla birlikdə daha ədalətli bir dünya yaratmağa töhfə verə biləcəyəm.
Bölmənin digər xəbərləri
