Azərbaycan atletləri Qosanov Memorialını dörd medalla başa vurublar
Bakı, 1 iyul, AZƏRTAC
Qazaxıstanın Çimkənd şəhərində təşkil olunan atletika üzrə XXXV Qosanov Memorialına yekun vurulub.
AZƏRTAC xəbər verir ki, Dünya Atletikası Kontinental Turun bürünc səviyyəli yarışının ikinci günündə mübarizəyə qoşulan Azərbaycan atletlərindən Yekaterina Sariyeva və Rüstəm Məmmədov uğurlu çıxış ediblər. Hər iki atlet üç təkanla tullanma növündə mükafatçılar sırasına düşüb. Sariyeva 13.47 metr nəticə ilə 2-ci yeri tutub. Rüstəm Məmmədov isə 15.85 metr göstərici ilə bürünc medal qazanıb.
Qeyd edək ki, Memorialın ilk günündə İlahə Quliyeva 400 metr məsafəyə qaçışda gümüş, Cabir Əliyev isə uzunluğa tullanma növündə bürünc medala sahib çıxmışdı.
Bölmənin digər xəbərləri
