Gürcüstanın yeniyetmə gimnastlardan ibarət komandası bədii gimnastika üzrə dekabrın 17-19-da keçiriləcək Azərbaycan birinciliyində iştirak etmək arzusundadır. Bunu AZƏRTAC-ın müxbirinə Bakıda olan Gürcüstan Gimnastika Federasiyası hakimlər kollegiyasının sədri Bella Kobaladzeyə istinadla Azərbaycan Gimnastika Federasiyasının (AGF) mətbuat xidmətindən bildirmişlər.

Bu, Azərbaycan gimnastlarının ötən yay Gürcüstanın açıq birinciliyində iştirakına cavab olacaqdır. B.Kobaladze demişdir ki, əvvəla, Tbilisi yeniyetmələr arasında beynəlxalq turnir keçirməyə hazırlaşır və Azərbaycan gimnastları bu turnirə birinci dəvət edilənlər arasında olacaqlar. İkincisi, biz may ayında Bakıda AGF Kuboku yarışlarında və oktyabrda Dünya çempionatında mütləq iştirak edəcəyik.

Son iki ildə ölkələrimizin federasiyaları arasında əməkdaşlıq keyfiyyətcə yeni səviyyəyə qalxmışdır. Bu da Azərbaycan Federasiyası rəhbərliyinin ölkədə gimnastikanın inkişafına xüsusi diqqət yetirməsi ilə əlaqədardır. Bundan əlavə, Bakıda beynəlxalq miqyaslı mötəbər yarışlar keçirilməyə başlanmışdır.

B.Kobaladze qeyd etmişdir ki, yüksəlişdə olan Azərbaycan gimnastikasını Gürcüstanda böyük maraqla izləyirlər. Azərbaycanda yaxşı gimnastlar nəsli yetişdirilmişdir. Anna Qurbanova Daşkənddə Dünya kuboku yarışlarında çox gözəl çıxış etmişdir. Zənnimcə, bu idmançı çox irəliləmişdir. Bunun nəticəsi olaraq proqramın ayrı-ayrı növlərində mükafata layiq görülmüşdür. Zənnimcə, Dinara Gimatova da yaxşı çıxış etmişdir. O, aldığı zədələrdən artıq sağalmış və turnirin ikinci günü daha yaxşı təsir bağışlamışdır. Vəfa Hüseynova, Dina Qorina, Valeriya Yeqay və Zeynəb Cavadlı da tərifəlayiqdirlər.

Beynəlxalq Gimnastika Federasiyasının hakimi olan B.Kobaladze onu da bildirmişdir ki, gələn ildən gimnastika qaydalarında dəyişikliklər olacaqdır.