AZƏRTAC xəbər verir ki, Azərbaycan komandasının iki üzvü – boksçular Cavid Tağıyev və Əli İsmayılov avqustun 14-də Afinada ilk görüşlərini keçirmişlər. Azərbaycan Prezidenti İlham Əliyev görüşləri izləmək üçün yarışların keçirildiyi salona gəlmişdi. Tamaşaçılar arasında Azərbaycan bayrağı ilə gəlmiş həmvətənlərimiz də az deyildi. Xatırladaq ki, Olimpiadanın boks yarışlarının baş hakimi Azərbaycan Boks Federasiyasının prezidenti Ağacan Abiyevdir.

75 kiloqram çəki dərəcəsində çıxış edən Cavid Tağıyev Yunanıstan idmançısı Georgios Gazis ilə qarşılaşmışdır. Görüş olduqca gərgin idman mübarizəsi şəraitində keçdi. Doğma divarlar arasında çıxış edən yunan boksçusu ilk dəqiqələrdən hücuma keçərək, hesabda irəli çıxdı və birinci raund 10:6 hesabı ilə onun xeyrinə başa çatdı. İkinci raund bərabər səviyyədə keçdi – 8:8. Üçüncü raund Cavidin üstünlüyü ilə keçsə də, ümumi hesab hələ də rəqibin xeyrinə idi. Lakin yunan boksçusunun yorulduğu aşkar hiss olunurdu. Daha gümrah görünən və həmvətənlərimizin qızğın azarkeşlik etdikləri Cavid Tağıyev hesabı bərabərləşdirdi və son saniyələrdə endirdiyi dəqiq zərbə ilə Olimpiadada ilk görüşündə qələbəni təmin etdi - 32-31. O, 1/8 finalda Tailand boksçusu ilə qarşılaşacaqdır.

81 kiloqram çəki dərəcəsində çıxış edən boksçumuz Əli İsmayılovun rəqibi braziliyalı Silva Vaşinqton idi. Təşəbbüsü dərhal ələ alan idmançımız ilk üç raundu 6:2, 7:6 və 8:5 hesabı ilə öz xeyrinə başa çatdırdı. Həlledici dördüncü raundda Braziliya boksçusu 3 xal artıq qazansa da, ümumi hesab Azərbaycan idmançısının xeyrinə oldu – 27:22. Beləliklə, daha bir boksçumuz 1/8 finala çıxdı.

Avqustun 14-də XXVIII Yay Olimpiya oyunlarında 13 dəst medal uğrunda mübarizə getmişdir. Yarışların ilk günü Çin idmançıları üçün uğurlu olmuşdur. Qadınların pnevmatik tüfəngdən 10 metr məsafəyə atəş açmaqda yarışında Li Du 502 xalla birinci yeri tutmuşdur. Kişilərin 10 metr məsafəyə pnevmatik tapançadan atəş açmaq yarışında isə onun həmvətəni Van İfu Rusiya idmançısı Mixail Nestruyevi cəmi 0,2 xal geridə qoyaraq, qızıl medala sahib olmuşdur. Kişilərin 400 metr məsafəyə kompleks üzgüçülük yarışında 4 dəqiqə 8,26 saniyə nəticə göstərən ABŞ idmançısı Maykl Pelps yeni dünya və olimpiya rekordu müəyyən etmişdir.

Avqustun 14-də Afinada Olimpiadanın Təşkilat Komitəsinin sədri xanım Angelopulos-Daskalakinin adından Yunanıstan paytaxtına gəlmiş dövlət və hökumət başçılarının, Beynəlxalq Olimpiya Komitəsi rəhbərlərinin şərəfinə ziyafət verilmişdir. Azərbaycan Prezidenti İlham Əliyev və xanımı Mehriban Əliyeva ziyafətdə iştirak etmişlər.