Azərbaycan ilə Türkiyə arasında əlaqələrin inkişafında Heydər Əliyevin böyük rolu olub
Qars, 12 dekabr, AZƏRTAC
Azərbaycanın Qarsdakı baş konsulluğu da ümummilli lider Heydər Əliyevin xatirəsini anma günü ilə əlaqədar mərasim təşkil edib.
Türkiyənin dövlət rəsmilərinin, ölkə ictimaiyyətinin nümayəndələrinin iştirakı ilə keçirilən mərasimdə baş konsul Ayxan Süleymanlı Ümummilli Liderin Azərbaycan dövləti və xalqı qarşısındakı tarixi xidmətlərindən bəhs edib. Heydər Əliyevin səyləri nəticəsində Türkiyə ilə Azərbaycan arasında siyasi, iqtisadi, mədəni və digər sahələrdə qurulan və inkişaf edən əlaqələr, nəhəng iqtisadi layihələr haqqında fikirlərini bildirən baş konsul diqqətə çatdırıb ki, Ümummilli Lider tərəfindən möhkəm təməl üzərində qurulan siyasi kursu Prezident İlham Əliyevin uğurla davam etdirməsi xalqlarımızın və dövlətlərimizin maraqlarını əks etdirir.
Sonra Heydər Əliyevin ruhuna Qurani-Kərimdən ayələr oxunub.
Tanınmış şair Murat Şanlı ulu öndər Heydər Əliyevə həsr etdiyi “Könüllər sultanı Əliyev” şeirini oxuyub.
Daha sonra Heydər Əliyevin həyat və fəaliyyətini əks etdirən sənədli film nümayiş olunub, ehsan süfrəsi açılıb.
Sabir Şahtaxtı
AZƏRTAC-ın xüsusi müxbiri
İstanbul
Bölmənin digər xəbərləri
