Azərbaycan millisinin baş məşqçisi: Litva ilə oyunun önəmi çox böyükdür
Bakı, 4 aprel, AZƏRTAC
“Litva ilə oyunun önəmi çox böyükdür”
AZƏRTAC xəbər verir ki, bu sözləri qadın futbolçulardan ibarət Azərbaycan yığmasının baş məşqçisi Siyasət Əsgərov UEFA Millətlər Liqasının qrup mərhələsində Litva yığmasına qarşı bu gün keçiriləcək oyunla bağlı AFFA-nın rəsmi saytına açıqlamasında deyib.
Mütəxəssis çox önəmli matça çıxacaqlarını bildirib: “Ardıcıl iki səfər görüşü keçirəcəyik. Dörd gün sonra Monteneqro kollektivinin qonağı olacağıq. Ancaq indi bütün diqqətimizi Litva ilə qarşılaşmaya yönəltmişik. Litva ilk matçda Monteneqroya məğlub olub. Üç komandalı qrupda yer aldığımızdan, bugünkü oyunun önəmi çox böyükdür. Bəzi itkilərimiz olsa da, komandaya cəlb olunan futbolçuların bu boşluğu dolduracaqlarına inanıram. Düşərgədə ab-hava yüksəkdir, heyətdə yer alan oyunçuların heç birinin zədəsi yoxdur. Rəqibi təhlil etmişik, zəif və üstün cəhətlərini bilirik. Məşq proseslərini də buna uyğun qurmuşduq. Rəqibi səhv buraxmağa məcbur edə bilsək, istədiyimiz nəticəni qazanacağıq”.
Qeyd edək ki, Vilnüsdəki “Jalgiris” stadionunda keçiriləcək Litva - Azərbaycan oyunu Bakı vaxtı ilə saat 19:30-da başlayacaq.
Bölmənin digər xəbərləri
