Avqustun 14-də Azərbaycan olimpiyaçıları Afinada Olimpiya kəndində milli yığma komandanın ən gənc üzvü, üzgüçü Natalya Filinanın doğum gününü qeyd etmişlər. Gənclər, İdman və Turizm Nazirliyinin mətbuat mərkəzindən AZƏRTAC-ın müxbirinə bildirmişlər ki, Azərbaycan nümayəndə heyətinin rəhbərləri də təbriklərə qoşulmuş və idmançıya hədiyyə təqdim etmişlər.

Bakıdakı 82 nömrəli məktəbin 11-ci sinif şagirdi, “Təhsil” İdman Cəmiyyətinin üzvü Natalya Filina üçün Afina ilk Olimpiadadır. İdmançının ilk çıxışı avqustun 15-də olacaqdır. Həmin gün o, brass üsulu ilə 100 metr məsafəyə üzgüçülük yarışlarının startına çıxacaqdır.