Azərbaycan Ordusu ərazilərimizdəki erməni silahlılarına qarşı lazımi tədbirlər həyata keçirəcək - Şərh
Bakı, 10 dekabr, AZƏRTAC
Biz mütəmadi olaraq Fransa və Ermənistan tərəfindən ölkəmizə qarşı məkrli proseslərin davam etdirilməsinin şahidiyik. Belə ki, bu gün Qərbi Zəngəzurda Fransanın başçılığı ilə Avropa İttifaqının (Aİ) xüsusi monitorinq missiyası erməni tərəfini daha da ruhlandırır. Həm də Ermənistanın Rusiyadan uzaqlaşaraq Qərbə yaxınlaşmasının təməllərini qoyur. Bundan əlavə, onlar Azərbaycanın öz məqsədlərinə çatmaması üçün məhz növbəti monitorinq qrupunu bu dəfə Ermənistan ərazisi ilə Laçın dəhlizinin girişinə gətirmək istəyirlər. Amma bu olduqca təhlükəli bir presedentdir.
Bu fikirləri AZƏRTAC-a açıqlamasında politoloq Zaur Məmmədov söyləyib.
Politoloqun fikirlərinə görə, fransız və erməni tərəfi başa düşsünlər ki, onlar Ermənistan daxilində işlər görə bilərlər. Lakin Azərbaycan ərazisi olan Laçın dəhlizində bütün proseslər Azərbaycanın icazəsi ilə reallaşır.
“David Babayan və Arayik Harutyunyan Qarabağ ermənilərinə beynəlxalq qarantiyanın vacib olması ilə bağlı tezislər bildirirlər. Bu da əlbəttə, onu göstərir ki, Emmanuel Makronun və Nikol Paşinyanın sentyabrda tərtib etdikləri planın davamı olaraq həm Aİ-nın xüsusi missiyasının Ermənistanda uzunmüddətli qalması, həm də Laçın dəhlizinə həmin o xüsusi missiyanın növbəti mandatlı nümayəndələrini göndərməsi gözlənilir. Əlbəttə ki, onların Laçınla bağlı planları reallaşmayacaq.
Ümumilikdə Fransanın separatçı siyasətçiləri, terrorçuları qəbul etməsi, onlara dəstək verməsi bu ölkənin beynəlxalq hüquqa hörmət etməməsinin, qərəzli davranışının nəticəsidir. Bu, bir daha onu göstərir ki, Fransa hazırda bütün dünya üçün üz qarasıdır”, - deyə Zaur Məmmədov vurğulayıb.
O bildirib ki, E.Makron ölkəsinin daxili problemləri ilə məşğul olmaqdansa, özünü ermənilərin müdafiəçisi kimi aparır. Fransa parlamentində qəbul edilən haqsız qətnamələrə Azərbaycanın səssiz qalacağını düşünürsə, yanılır. Əksinə, dövlət səviyyəsində Fransaya necə lazımdırsa cavab verilir və bundan sonra da veriləcək.
Rəsmi Paris doğrudan da Cənubi Qafqazda sülh prosesinə çox ciddi şəkildə xələl gətirir, zərbə endirir. Əgər Fransa Qarabağ separatçılarına, N.Paşinyana ümid verməsəydi, biz bu gün Ermənistan dövlətinin öhdəliklərini yerinə yetirməsi ilə bağlı fərqli davranışın şahidi ola bilərdik.
“Amma müəyyən ölkələrin, qrupların Ermənistana dəstəyi hadisələri bu yerə gətirib çıxardıb. Necə ki, 30 il ərzində Ermənistan kimlərəsə arxayın idi və nəyəsə ümid edirdi, bu gün də eyni situasiyanın şahidiyik. Amma düşmən tərəfi anlamalıdır ki, Ermənistan münaqişəyə səbəb olan davranışından əl çəkməsə, Azərbaycan Ordusu nəinki qanunsuz silahlı erməni birləşmələrinin yerləşdiyi ərazilərdə, hətta tarixi Azərbaycan torpaqları olan Zəngəzurda, Göyçədə də lazımi tədbirlər həyata keçirəcək”, - deyə politoloq vurğulayıb.
Bölmənin digər xəbərləri
