Azərbaycan “Oyun Tərtibatçıları Konfransı 2025”də təmsil olunub
Bakı, 27 mart, AZƏRTAC
Azərbaycan Respublikası Mədəniyyət Nazirliyinin dəstəyi ilə ölkəmizin oyun ekosistemini təmsil edən nümayəndə heyəti mart ayında ABŞ-ın San-Fransisko şəhərində keçirilən dünyanın ən nüfuzlu tədbirlərindən biri olan “Oyun Tərtibatçıları Konfransı”nda (Game Developers Conference – GDC 2025) iştirak edib.
Nazirlikdən AZƏRTAC-a bildirilib ki, səfər çərçivəsində Azərbaycan nümayəndələri beynəlxalq oyun studiyaları, texnologiya şirkətləri və investorlarla birbaşa əlaqələr qurmaq, oyun sənayesindəki qlobal trendlərlə tanış olmaq və yerli məhsulların qlobal bazarlara çıxışı üçün imkanları araşdırmaq imkanı əldə ediblər.
Mədəniyyət Nazirliyi tərəfindən nümayəndə heyətinin bu konfransda iştirakı, “Azərbaycan Respublikasının 2022–2026-cı illərdə sosial-iqtisadi inkişaf Strategiyası”nın müvafiq bəndində nəzərdə tutulan tədbirlərin icrası çərçivəsində həyata keçirilib.
Həmçinin “Oyun Tərtibatçıları Konfransı 2025” çərçivəsində Beynəlxalq Oyun Tərtibatçıları Assosiasiyası tədbirində qurumun Azərbaycan fəslinin rəsmi açılışı elan olunub.
“Gametech” klasteri Azərbaycanda yeni investisiyaları cəlb etməyə, hekayələr, qrafik dizayn və animasiya kimi sahələrdə çalışan mütəxəssislərin təkmilləşməsinə, mədəni irsin innovativ üsullarla tanıdılmasına və qeyri-neft sektorunun şaxələndirilməsinə təkan verir.
Bölmənin digər xəbərləri
