AZƏRBAYCAN PREZİDENTİ İLHAM ƏLİYEVİN VƏ RUSİYA PREZİDENTİ DMİTRİ MEDVEDEVİN GÖRÜŞÜ
Sankt-Peterburq, 4 iyun (AZƏRTAC). Xüsusi müxbirimiz xəbər verir ki, iyunun 4-də Sankt-Peterburqda, “Konstantinovski” sarayında Azərbaycan Prezidenti İlham Əliyevin və Rusiya Prezidenti Dmitri Medvedevin görüşü olmuşdur.
Rusiya Federasiyasının Prezidenti DMİTRİ MEDVEDEV Azərbaycan dövlətinin başçısına müraciətlə dedi:
-Hörmətli İlham Heydər oğlu, Sizi Peterburq şəhərində salamlamaq istəyirəm. Bu gün hava ilə razılığa gələ bilməsək də, mənim üçün çox xoşdur ki, Siz gəlmisiniz.
İndi bizim üçün işin gərgin vaxtıdır: forum keçirilir və bu bizə görüşmək, ikitərəfli münasibətlərimizi müzakirə etmək, regional problemlər haqqında danışmaq üçün əlavə imkanlar verir. Bu gün bizim hamını narahat edən - dünyada baş verən maliyyə və iqtisadi böhranın nəticələri, ölkələrimiz üçün çox aktual olan enerji təhlükəsizliyi məsələsi ilə bağlı müzakirə edəcəyimiz çoxlu mühüm mövzular, birgə maraqlı layihələr vardır. Biz fikirləşməliyik ki, son dövrdə əldə etdiyimiz əmtəə dövriyyəsinin səviyyəsi dünya iqtisadi konyunkturasında baş verən dəyişikliklərə uyğun olaraq əhəmiyyətli dərəcədə enməsin, bir növ bizim ikitərəfli fəaliyyətimizdən asılı olsun.
Mən əlbəttə, ikitərəfli humanitar layihələri çox vacib hesab edirəm. Siz bu məsələlərə, o cümlədən rus dili ilə bağlı layihələrə böyük diqqət yetirirsiniz. Biz bunu qiymətləndiririk, buna görə Sizə minnətdarıq. Əlbəttə, digər ideyalar da vardır. Xoş gəlmisiniz. Sizi Peterburqda görməyimə çox şadam.
Azərbaycan Prezidenti İLHAM ƏLİYEV təşəkkür edərək dedi:
-Çox sağ olun Dmitri Anatolyeviç. Dəvətə görə təşəkkür edirəm. Sizinlə görüşmək və çox geniş gündəlik üzrə diskussiyalarımızı davam etdirmək üçün yeni imkan əldə etdiyimə görə çox şadam.
Bizim görüşlərimiz kifayət qədər müntəzəm, intensiv xarakter daşıyır və bu, ölkələrimiz arasında münasibətlərin inkişaf səviyyəsini əks etdirir. Biz çox məmnunuq ki, əlaqələrimiz inkişaf edir və Sizin də qeyd etdiyiniz kimi əlaqələrimiz bir çox istiqamətlərdə - həm siyasi qarşılıqlı fəaliyyət, həm də iqtisadi planda inkişaf edir. Böhrana baxmayaraq, ümid edirəm ki, əmtəə dövriyyəsi çox da güclü zərər çəkməyəcək.
Hesab edirəm ki, humanitar planda bizim münasibətlər nümunəvi ola bilər. Çox iş görülmüşdür, eyni zamanda, gələcək üçün çoxlu planlar vardır.
Bizim çox geniş gündəliyimiz və həmişə olduğu kimi, danışıqlar üçün çoxlu mövzu, - regional məsələlər və bizim regionda təhlükəsizlik məsələləri, bu gün xüsusi əhəmiyyət və aktuallıq kəsb edən neft-qaz sahəsində əməkdaşlıq məsələləri, - vardır. Təbiidir ki, bu məsələlərin bir daha müzakirə edilməsi və gələcək inkişafın yollarının yenidən birgə müəyyənləşdirilməsi böyük əhəmiyyətə malikdir. Böhrana baxmayaraq, həm Rusiya, həm də Azərbaycan nümayiş etdirirlər ki, bizim ölkələrimiz inkişaf etməyə, öz ehtiyatları hesabına yaşamağa qadirdirlər, bu da çox vacibdir. Mən əminəm ki, bu əməkdaşlıq gələcəkdə elə bu cür konstruktiv, gözlənilən, dostluq xarakterli olacaqdır. Dəvətə görə bir daha təşəkkür edirəm.
DMİTRİ MEDVEDEV: Sağ olun.
######
 |
 |
 |
 |
 |
 |
 |
Bölmənin digər xəbərləri
