Azərbaycan sahibkarları İslamabadda keçiriləcək səhiyyə sərgisinə dəvət olunublar
Bakı, 15 avqust, AZƏRTAC
Avqustun 16-17-də Pakistanın İslamabad şəhərində özündə konfranslar və səhiyyə sərgisini birləşdirən “MedHealth Expo & Summit 2023” tədbiri keçiriləcək.
AZPROMO-dan AZƏRTAC-a bildirilib ki, Azərbaycan sahibkarları sözügedən tədbirdə iştiraka dəvət olunublar.
Ravalpindi Ticarət və Sənaye Palatası tərəfindən təşkil olunan “MedHealth Expo & Summit 2023” yerli və beynəlxalq bazarlardan tibbi xidmət təminatçıları və xammal təchizatçıları, o cümlədən həkimlər və digər səhiyyə mütəxəssislərinin iştirak edəcəyi Pakistanın ən böyük səhiyyə sərgisidir. Tədbirə, həmçinin Pakistanın Dərman Vasitələrinin Tənzimləmə İdarəsinin nümayəndələri, dövlət rəsmiləri və diplomatik təşkilatların təmsilçiləri qatılacaqlar.
Qeyd edək ki, Pakistanın əczaçılıq sənayesi rəqabətədavamlı qiymətlərlə yüksəkkeyfiyyətli dərman vasitələrinin istehsalı ilə tanınır və bu amil Pakistanda istehsal olunan əczaçılıq məhsullarını əlverişli səhiyyə həlləri axtaran ölkələr üçün cəlbedici edir.
Bölmənin digər xəbərləri
