AZƏRBAYCAN SƏFİRLİYİ İNGİLTƏRƏNİN FUTBOL AZARKEŞLƏRİ ÜÇÜN “DƏYİRMİ MASA” KEÇİRMİŞDİR
Səfirlikdən AZƏRTAC-a bildirmişlər ki, sentyabrın 30-da səfirlik əməkdaşlarının iştirakı ilə İngiltərə yığması azarkeşlərinin ən böyük klubları olan “London England Fans” və “365” klubları üçün “dəyirmi masa” keçirilmişdir.
Təxminən 60 futbol azarkeşinin iştirak etdiyi “dəyirmi masa”da səfirliyin əməkdaşları, Britaniyanın Xarici İşlər və Birlik İşləri Nazirliyinin əməkdaşı və Azərbaycanda fəaliyyət göstərən “United Aid for Azerbaijan” humanitar təşkilatının nümayəndəsi Azərbaycanın tarixi, mədəniyyəti, mətbəxi, turizm imkanları, habelə ölkəmizin futbol tarixi və Tofiq Bəhramov haqqında azarkeşlərə məlumat vermişlər.
Bakıya gələn ingilis azarkeşlərin bir hissəsi 1966-cı ildə dünya çempionatının finalında T.Bəhramovun qərarına minnətdarlıq əlaməti olaraq ön tərəfində “Çox sağ olun” sonra isə ingiliscə “Çox sağ olun yan xətt hakimi Tofiq Bəhramov, İngiltərə 4 Almaniya 2, Dünya Çempionatı, Uembli, 30 iyul 1966-cı il, Azərbaycan-İngiltərə 13 oktyabr 2004-cü il”, arxasında isə “Bəhramov 66” sözləri yazılmış maykalarda olacaqlar.
“Dəyirmi masa”da İngiltərə azarkeşlərinin nümayəndəsi Bakıdakı uşaq evlərinin birinə azarkeşlər tərəfindən yardım göstərilməsinin nəzərdə tutulduğunu bildirmişdir.
Bölmənin digər xəbərləri
