Bakı, 23 avqust, AZƏRTAC

Azərbaycanda Özbəkistanı çox sevirlər. Hətta regional və qlobal proseslərə tamamilə əks baxış bucağından yanaşan, ölkənin, bölgənin və dünyanın gələcəyini fərqli görən insanlar da Özbəkistana və qardaş özbək xalqına az qala eyni sevgi, eyni hörmətlə yanaşırlar. Şübhə etmirəm ki, bu, Özbəkistanda da belədir. Bütün bunlar dostluq, qardaşlıq bağlarımızın, ortaq dəyərlərimizin, mədəniyyətimizin, tariximizin köklərinin nə qədər dərində olduğunun sübutudur. Biz azərbaycanlılar pisliyi bağışlaya bilirik, amma yaxşılığı, gerçək dostluğu, qardaşlığı, səmimi, təmənnasız sevgidən doğan dəstəyi də heç vaxt unutmuruq. Azərbaycan torpaqlarının işğal altında olduğu və işğaldan azad edildiyi dönəmdə özbək xalqının mərd, ləyaqətli, ağayana duruşu, kədərimizə də, sevincimizə də eyni dərəcədə şərik olması heç vaxt unudulmayacaq.

Bu fikirləri AZƏRTAC-a açıqlamasında siyasi ekspert Elçin Mirzəbəyli deyib.

Siyasi ekspertin sözlərinə görə, Şavkat Mirziyoyevin ölkəmizə gəlişinin tarixi əhəmiyyətini artıran məqamlardan biri də onun yenidən qardaş Özbəkistanın Prezidenti seçildikdən sonra ilk səfərini Azərbaycana etməsidir. Bu, Özbəkistanın Azərbaycan verdiyi böyük önəmlə yanaşı, həm də ölkəmizin Türk dövlətlərinin bir araya gəlməsində həyata keçirdiyi mühüm missiyaya verilən yüksək dəyər kimi qiymətləndirilməlidir.

Prezident İlham Əliyevin 2011-ci ildə Naxçıvan Bəyannaməsinin imzalandığı vaxtdan həyata keçirdiyi tarixi missiya artıq öz bəhrəsini verməkdədir. Azərbaycan türk xalqları arasındakı birləşdirici təyinatını, coğrafi, siyasi və mədəni körpü missiyasını çox böyük uğurla həyata keçirməkdədir. Səfər çərçivəsində bu missiyanın coğrafi aspektlərində də xüsusi diqqət ayrılması hədəfin kifayət qədər aydın və çoxşaxəli, geniş spektrli olduğunu təsdiqləyir.

“Prezident İlham Əliyev mətbuata açıqlamasında bu məqamlara xüsusi diqqət çəkdi. Görüşlər çərçivəsində iki ölkə arasında mövcud münasibətlərin möhkəmlənməsi istiqamətində bütün nailiyyətlərin ətraflı təhlil edildiyini bildirən dövlətimizin başçısı münasibətlərimizin gələcək inkişaf yollarının müzakirə və müəyyən olunduğunu diqqətə çatdırdı.

Beləliklə, Özbəkistan rəhbərinin səfəri çərçivəsində münasibətlərimizin inkişafının gələcəyi müəyyən edildi. Hazırkı nəticələr münasibətlərin düzgün yolla irəlilədiyini göstərir.

Eyni yanaşma Prezident Şavkat Mirziyoyevin bəyanatında da özünü büruzə verdi. Özbəkistan Prezidenti bildirdi ki, Azərbaycanla Özbəkistanın yaxın hədəfləri “münasibətlərin fərqli səviyyəsini, sənayenin lokallaşdırılmasının, nəqliyyat logistikasının müxtəlif səviyyələrini təmin etmək üçün çox ciddi layihələrdir. Çünki bu gün bizim üçün, Özbəkistan üçün iqtisadiyyatımızda ümumilikdə nəqliyyat sahəsi çox ciddi komponentdir. Biz isə öz istiqamətimizi ən yaxın ölkə olan Azərbaycanla müəyyən edirik və hesab edirəm ki, bu, yeganə düzgün qərardır.

Göründüyü kimi, Azərbaycan və Özbəkistan qarşıdakı illərdə, müasir dövrdə mühüm əhəmiyyət kəsb edən bir sıra strateji layihələri gerçəkləşdirməyi planlaşdırırlar və hər iki ölkənin ərazisindən keçən nəqliyyat dəhlizlərinin imkanlarından maksimum dərəcədə yararlanmağa çalışacaqlar", - deyə E.Mirzəbəyli qeyd edib.

Nəqliyyat kommunikasiyalarının inkişafının qarşılıqlı münasibətlərdə əsas strateji istiqamətlərdən biri olduğunu vurğulayan siyasi ekspert deyib: “Qeyd edim ki, həm Azərbaycan, həm də Özbəkistan ərazisindən çoxsaylı beynəlxalq və regional nəqliyyat dəhlizləri keçir. 2018-ci ildən etibarən, Özbəkistan nəqliyyat infrastrukturunun yenilənməsinə, ölkənin logistik imkanlarının genişlənməsinə böyük önəm verir. Azərbaycan isə bu istiqamətdə, artıq uzun illərdir ki, mühüm layihələr həyata keçirir və bu proses davam etməkdədir”.

E.Mirzəbəylinin sözlərinə görə, dünyada baş verən dəyişikliklər və yaranan yeni reallıqlar nəticəsində nəqliyyat dəhlizlərinin şaxələndirilməsinin və təhlükəsizliyinin mühüm amilə çevrildiyini nəzərə alsaq, həm Azərbaycan, həm də Özbəkistanın olduqca mühüm və strateji əhəmiyyət kəsb edən geostrateji mövqelərə sahib olduqlarını müəyyənləşdirə bilərik. Bu xüsusda Transxəzər beynəlxalq nəqliyyat dəhlizinin yaxın perspektivdə subregion üçün həyati əhəmiyyət kəsb edən istiqamətə çevrilə biləcəyi perspektivinin də yüksək olduğunu söyləmək mümkündür. Özbəkistanın Transxəzər nəqliyyat dəhlizinə marağının artması və sözügedən istiqamətdə yeni layihələrin həyata keçirilməsində maraqlı görünməsi də mövcud reallıqlardan qaynaqlanmaqla yanaşı gələcəyə yönəlmiş strateji addımlardır. Ortaq layihələr və nəqliyyat dəhlizlərinin inteqrasiyası, şübhəsiz ki, Azərbaycanla Özbəkistanı bir-birinə daha sıx şəkildə bağlayacaq.

Siyasi ekspert vurğulayıb ki, Azərbaycanın uzun illərdən bəri yürütdüyü, ölkənin güclü bir dövlətə çevrilməsi istiqamətində həyata keçirilən siyasətin real nəticələrə gətirib çıxarması və nəhayət 44 günlük Vətən müharibəsində qazanılan Zəfər Türk xalqlarının dövlətçilik tarixində mühüm yerə malik olan qardaş Özbəkistanda da rəğbətlə qarşılanıb və eyni zamanda, qarşılıqlı münasibətlərin inkişafına, ortaq və təhlükəsiz gələcəyin perspektivinə olan inamı daha da artırıb.

“Çağdaş dünyanın reallıqları belədir: Güclü olmasan, sənə hörmət bəsləməyəcəklər. Azərbaycan ərazilərinin işğal altında olduğu zaman kəsiyində yaşadıqlarımızdan çıxardığımız nəticəni xalqımız və dövlətimiz üçün əsas hədəf kimi müəyyənləşdirməyimiz bizə qalib gəlməyin yeganə yolunu öyrətdi.

Qardaş Özbəkistanın dövlət başçısının ölkəmizə səfəri çərçivəsində əldə olunan razılaşmaların, atılan addımların, deyilən sözlərin hər biri qarşılıqlı əməkdaşlığın təməl faktorlarına və gələcəyinə işarə etməklə yanaşı, bütövlükdə Türk dünyasının ortaq hədəfləri üçün də mühüm əhəmiyyətə malikdir.

Qənaətimə görə, Özbəkistan Prezidentinin mətbuat üçün bəyanatında dövlətimizin başçısına xitabən səsləndirdiyi fikirlər qarşılıqlı münasibətlərin perspektivini müəyyənləşdirmək üçün yetərlidir. Sitat: “İlham Heydər oğlu, bir müddət keçəcək bizə tərcüməçi lazım olmayacaq və ya burada iki dildə danışmağa ehtiyac qalmayacaq. Düşünürəm ki, biz eyni köklərə malikik və bir-birimizlə ortaq dildə danışacağıq”.

Bəli, Özbəkistan və Azərbaycan, bütövlükdə Türk dünyası tarixin amansız dönəmlərində qopardılmış bağları yenidən və həm də möhkəm təməllər üzərində birləşdirir. Hədəf Türk dünyasının birliyi, rifahı və öz tarixi kökləri üzərindən inkişafıdır.

Azərbaycan xalqı bu prosesdə öz Liderinin oynadığı tarixi missiya ilə qürur duya bilər”, - deyə E.Mirzəbəyli fikirlərini yekunlaşdırıb.