Azərbaycan-Türkiyə: vahid güc mərkəzi
Bakı, 17 aprel, AZƏRTAC
Müasir dünya siyasətinin iqtisadi və geosiyasi mənzərəsi o qədər sürətlə dəyişir ki, hətta iki dövlətin münasibətlərindəki dostluğu bir neçə ildən artıq müşahidə etmək olmur. Bu baxımdan, keçmişə əsaslanaraq gələcək yüzilliklərə də proqnoz vermək olar ki, Azərbaycan - Türkiyə münasibətləri dünyanın heç dövləti ilə müqayisəyə gəlməz. Azərbaycanlıların Çar Rusiyasının əsarətində olduğu zamanda Çanaqqala savaşında şəhid verməsi, Osmanlı Türkiyəsinin Azərbaycan Xalq Cümhuriyyətinin köməyinə gəlməsi, sovet işğalı dövründə belə Atatürk Cümhuriyyətinə Azərbaycan xalqının dəstəyi onu göstərir ki, bu iki dövlətin münasibətlərinin tarix üçün bir təkzibolunmaz həqiqəti var: bir millət, iki dövlət...
Ümummilli Lider Heydər Əliyevin ifadə etdiyi və ən yaxın tariximizin aforizminə çevrilmiş bu məşhur fikrin praktik icrasını Prezident İlham Əliyev və cənab Rəcəb Tayyib Ərdoğan uğurla davam etdirərək dünyanın yeni siyasi düzəninə möhür vurdular. Liderlər birgə fəaliyyəti ilə sübut etdilər ki, iki qüdrətli dövlətin bir millətinin qarşısında bütün manelər kiçikdir.
AZƏRTAC xəbər verir ki, bu sözləri Milli Məclisin deputatı, YAP İdarə Heyətinin üzvü Rəşad Mahmudov söyləyib.
Deputat bildirib ki, dünya siyasi sisteminə ədalət, halallıq gətirən, fəaliyyətləri millətə xidmət nümunəsi olan prezidentlər İlham Əliyevin və Rəcəb Tayyib Ərdoğanın liderliyi altında Azərbaycan- Türkiyə münasibətlərinə həsəd aparan ölkələr var. Yüksək səviyyəli əməkdaşlıqdan sonra liderlərin səyi nəticəsində Azərbaycan- Türkiyə əlaqələri müttəfiqlik statusuna qədəm qoydu. 2021-ci il iyunun 15-də Şuşa şəhərində Azərbaycan və Türkiyə prezidentləri arasında müttəfiqlik münasibətləri haqqında imzalanmış Bəyannamə siyasi, iqtisadi və digər sahələrdə birliklə yanaşı, türk xalqlarına düşmən kəsilənlərə sərt xəbərdarlıqla müşahidə olunan ortaq mesaj idi.
Ölkəmizin ən ağrılı problemi olan Qarabağın işğaldan azad olunması ilə başa çatan 44 günlük Vətən müharibəsində Azərbaycan dostlarını bir daha tanıdığı zaman Türkiyənin və xüsusi olaraq Rəcəb Tayyib Ərdoğanın qardaşlığına şahid oldu. Müharibənin ilk günlərində “Azərbaycanın haqqını heç kimə yedirtmərik” bəyanatı ilə cənab Ərdoğanın və sevimli Türkiyənin mənəvi-siyasi, diplomatik dəstəyi hər birimiz üçün unudulmaz tarixi məqam oldu. Müharibədən sonra Türkiyənin işğaldan azad edilmiş ərazilərimizdə Türkiyə-Rusiya Birgə Mərkəzində təmsil olunması bizə əlavə güc verməklə yanaşı, sabitliyə təminat idi. Prezident İlham Əliyevin də qeyd etdiyi kimi, Azərbaycan-Türkiyə birliyi və qardaşlığı gələcək nəsillərə strateji yol xəritəsi, əbədi və sarsılmaz miras olaraq qalacaq.
Qardaş ölkədə baş vermiş və kütləvi insan tələfatı ilə nəticələnən zəlzələ Türkiyədə olduğu kimi, Azərbaycanda da ürək ağrısı ilə qarşılandı. Prezident İlham Əliyevin tapşırığına uyğun olaraq Azərbaycan var-gücü ilə təbii fəlakətin yaratdığı fəsadların aradan qaldırılmasına səfərbər olundu. Azərbaycan dövləti Türkiyənin yanında olan ilk ölkə kimi bütün imkanları ilə ardıcıl şəkildə yardımlarını intensivləşdirdi. Bununla yanaşı, ölkəmiz qardaşlıq marafonu altında humanitar aksiya keçirərək Türkiyəyə göstərdiyi yardımlarla bir daha diqqət mərkəzinə düşdü. Dünya bir daha şahidi oldu ki, təkcə ölkələrimiz yox, insanlarımız da bir-birinin yanındadır və birlik elə budur.
Sonda Rəşad Mahmudov qeyd edib ki, bu münasibətlərin davamı olaraq, Azərbaycan və Türkiyə prezidentlərin fəaliyyəti nəticəsində Türk Dövlətləri Təşkilatı nüfuzlu və uğurlu platformaya çevrilə bilib. Bu amil türk dünyasının birləşməsinə ciddi töhfələrini verməkdədir. Bu isə bizi qürurlandırdığı kimi, həm də yenilməz edir. Şübhəsiz, Türk Dövlətləri Təşkilatı İlham Əliyev və Rəcəb Tayyib Ərdoğanın liderliyi altında vahid güc mərkəzi kimi təhlükəsizliyin, davamlı sülhün konturlarını yaradır. Tarixə qardaşlıq salnaməsi kimi həkk olunan bu birlik bütövlüyümüzün təminat sənədidir.
Bölmənin digər xəbərləri
