Azərbaycan və Türkiyə qardaşlığını, birliyini müttəfiqlik səviyyəsinə yüksəltməyi bacardı - Açıqlama
Bakı, 11 aprel, AZƏRTAC
Azərbaycan və Türkiyə qardaşlıq, tarix, din, dil birliyini strateji tərəfdaşlıq, müttəfiqlik səviyyəsinə yüksəltməyi bacarıblar. Xüsusilə Rəcəb Tayyib Ərdoğanın hakimiyyəti dövründə bu münasibətlər daha da dərinləşib və iki ölkə bu mənada əsl nümunə göstərir.
Bu fikirləri AZƏRTAC-a açıqlamasında Milli Məclisin deputatı Könül Nurullayeva söyləyib.
Deputat qeyd edib ki, dünya miqyasında mənəvi-siyasi cəhətdən bir-birinə ən yaxın olan Azərbaycan və Türkiyə ortaq siyasi iradə, birgə fəaliyyətlə gələcək hədəflərə çatmaq əzmində olan nadir müttəfiqlərdir. Bildirilib ki, ölkələrimizin sarsılmaz birliyini təmin edən bir neçə amil var. Təbii ki, münasibətlərin ən yüksək səviyyəyə çatmasında liderlərin rolu xüsusi əhəmiyyət kəsb edir. Uğurlu yol keçən, dünya miqyasında güc mərkəzinə çevrilən Azərbaycanla Türkiyə arasında hər hansı bir sıxıntı müzakirə mövzusu ola bilməz. Ankara və Bakı bütün beynəlxalq təşkilatlar çərçivəsində də vahid mövqedən çıxış edir. Ölkələrimiz BMT, ATƏT, İslam Əməkdaşlıq Təşkilatı, Avropa Şurası və digər təşkilatlarda fəal işbirliyi aparmaqla bir-birinin gücünü artırır. Bu möhkəm həmrəylik Türk dünyasında əlaqələrin inkişafı baxımından da önəmlidir. Yeni dünya nizamının formalaşdığı şəraitdə türk dövlətlərinin dövrün çağırışlarına cavab verməklə milli strateji hədəflərə çatmaları üçün zəmin və fürsət yaranıb. Türkdilli ölkələrin qarşısında yeni perspektivlər açılmaqdadır.
“Prezident İlham Əliyevin də söylədiyi kimi, Azərbaycan-Türkiyə strateji müttəfiqlik münasibətləri Qafqaz və region üçün sülh və sabitlik mənbəyidir. Təsadüfi deyil ki, Vətən müharibəsində də qardaş Türkiyə “Bir millət, iki dövlət” prinsipinə layiq bir mövqe nümayiş etdirdi. İkinci Qarabağ müharibəsinin ilk saatlarından son dəqiqələrinədək Türkiyə Azərbaycanın yanında oldu. Azərbaycan Prezidenti dəstək üçün öz təşəkkürünü belə bildirdi: “Əziz qardaşım, hörmətli Cümhurbaşqanı ilk saatlarda Azərbaycana mənəvi dəstək göstərdi, bütün dünyaya bəyan etdi ki, Azərbaycan tək deyil, Türkiyə Azərbaycanın yanındadır. Bu, bizə çox böyük siyasi və mənəvi dəstək, əlavə güc verdi”.
Qars müqaviləsindən 100 il sonra imzalanmış Şuşa Bəyannaməsi isə ortaq tariximizə əsaslanmaqla yanaşı, müasir reallıqları əks etdirir, eləcə də Azərbaycan ilə Türkiyə arasında mövcud və gələcək işbirliyinin strateji istiqamətlərini müəyyənləşdirir. Bu sənəd Azərbaycan və Türkiyənin milli gücünün artmasını, dünyada söz və nüfuz sahibi kimi mövqeyinin daha da möhkəmlənməsini şərtləndirir”, - deyə K.Nurullayeva qeyd edib.
Deputat vurğulayıb ki, 44 günlük Vətən müharibəsində qazandığımız böyük Zəfərdən sonrakı bərpa prosesində də Türkiyə Azərbaycanın yanındadır. Nüfuzlu türk şirkətləri Qarabağda infrastruktur layihələrinin icrasında fəal iştirak edir. R.T.Ərdoğan azad edilmiş torpaqların yenidən qurulması və bərpası prosesində dəstəyin fasiləsiz davam edəcəyini bildirib.
“Dövlətimizin başçısının qeyd etdiyi kimi, İkinci Qarabağ müharibəsi və müharibədən sonrakı dövr Azərbaycan-Türkiyə birliyini daha da gücləndirdi. Türkiyə-Azərbaycan birliyi bölgədə çox önəmli sülh, sabitlik amilidir və kimsə yenə də bizə qarşı ədalətsiz hərəkət etmək istəsə, əlbəttə ki, bu amili ciddi nəzərə almalıdır”, - deyə Könül Nurullayeva vurğulayıb.
Bölmənin digər xəbərləri
