Azərbaycan və Türkmənistan parlamentləri arasında memorandum imzalanıb
Bakı, 8 dekabr, AZƏRTAC
Türkmənistanda rəsmi səfərdə olan Milli Məclisin sədri Sahibə Qafarova bu ölkənin Milli Qenqeşi Xalq Məsləhətinin sədri Qurbanqulu Berdiməhəmmədovla görüşüb.
Milli Məclisin Mətbuat və ictimaiyyətlə əlaqələr şöbəsindən AZƏRTAC-a bildirilib ki, görüşdə parlamentlərimiz arasında münasibətlərin inkişafına dair fikir mübadiləsi aparılıb.
Sonra görüş nümayəndə heyətlərinin iştirakı ilə davam etdirilib. Türkmənistanın dost və qardaş Azərbaycanla münasibətlərin inkişafına böyük əhəmiyyət verdiyini bildirən Qurbanqulu Berdiməhəmmədov deyib ki, bu il ölkələrimiz arasında diplomatik əlaqələrin qurulmasının 30-cu ildönümü tamam olur. Bu illər ərzində ölkələrimiz bir sıra sahələrdə, o cümlədən siyasi, iqtisadi, mədəni-humanitar sahələrdə uğurlu əməkdaşlıq əlaqələri qurub. O, son illərdə ölkələrimiz arasında ticari-iqtisadi göstəricilərin daha da yüksəldiyini, bununla belə, əməkdaşlığın müxtəlif istiqamətlərdə daha da genişləndirilməsi üçün yaxşı imkanların olduğunu bildirib.
Azərbaycanla Türkmənistanın bir çox beynəlxalq platformalarda da əməkdaşlıq etdiyini deyən Xalq Məsləhətinin sədri, həmçinin Qoşulmama Hərəkatı çərçivəsində əməkdaşlığa diqqət çəkib. Azərbaycanın təşəbbüsü ilə Hərəkatın Parlament Şəbəkəsinin yaradılmasının önəmini qeyd edən Q. Berdiməhəmmədov bildirib ki, Türkmənistan Şəbəkənin işində fəal iştirak etmək niyyətindədir. Vurğulanıb ki, təşkilatın Bakıda keçirilən birinci konfransında Türkmənistan Milli Qenqeşi Məclisi sədrinin iştirakı bunun təsdiqidir.
Hazırda parlament diplomatiyasının beynəlxalq münasibətlər sistemində əhəmiyyətinin daha da genişləndiyini bildirən Qurbanqulu Berdiməhəmmədov Türkmənistanın bu istiqamətdə fəaliyyətə böyük əhəmiyyət verdiyini qeyd edib. O, Azərbaycan ilə Türkmənistan arasında parlamentlərarası əlaqələrin daha da genişləndiyinə diqqət çəkərək, bu səfərin də qanunverici orqanlar arasında əməkdaşlığa töhfə verəcəyinə inamını ifadə edib.
Göstərilən yüksək qonaqpərvərliyə görə təşəkkürünü ifadə edən Milli Məclisin sədri Sahibə Qafarova deyib ki, Azərbaycanla qardaş Türkmənistan arasındakı münasibətlərin bugünkü səviyyəsi, qarşılıqlı faydalı əməkdaşlığın inkişafı məmnunluq doğurur. O, münasibətlərimizin yüksək səviyyəyə yüksəlməsində iki ölkənin dövlət başçılarının rolunu xüsusi qeyd edib. Azərbaycan və Türkmənistanın bir çox sahələrdə əməkdaşlıq etdiklərini bildirən parlamentin sədri xüsusən energetika, nəqliyyat sahələrində əlaqələrin uğurla inkişafını qeyd edib.
Milli Məclisin sədri deyib ki, Azərbaycanla Türkmənistan arasında ikitərəfli və çoxtərəfli münasibətlərə mühüm və müsbət təsir göstərən amillərdən biri də parlamentlərimizin qarşılıqlı fəaliyyətidir. Qeyd olunub ki, bu gün qanunverici orqanlarımız arasında çox səmərəli əməkdaşlıq qurulub və bu əməkdaşlığı daha da dərinləşdirmək üçün yaxşı imkanlar var. Sahibə Qafarova Azərbaycan Respublikası Milli Məclisinin sədri kimi Türkmənistana ilk rəsmi səfərinin parlamentlərimiz və ölkələrimiz arasında əlaqələrin daha da möhkəmləndirilməsinə və genişləndirilməsinə töhfə verəcəyinə inamını ifadə edib.
Azərbaycanla Türkmənistanın beynəlxalq təşkilatlarda bir-birinə dəstək verdiyini xatırladan Milli Məclisin sədri, o cümlədən, beynəlxalq parlament təşkilatlarında da uğurlu əməkdaşlığı qeyd edib. O, xüsusilə Azərbaycan Respublikasının Prezidenti İlham Əliyevin təşəbbüsü ilə yaradılan Qoşulmama Hərəkatının Parlament Şəbəkəsi çərçivəsində əlaqələrin əhəmiyyətini vurğulayıb. Sahibə Qafarova xatırladıb ki, Parlament Şəbəkəsi 2021-ci ilin noyabrında Madriddə təsis olunub. Onun ilk konfransı bu ilin iyununda Bakıda keçirilib. Qoşulmama Hərəkatının Parlament Şəbəkəsinin növbəti konfransının gələn ilin martında Manama şəhərində keçirilməsi planlaşdırılır. O, tədbirə hazırlıq məqsədilə görülən işlər barədə məlumat verib, Azərbaycanın bu təşkilatın institusional inkişafı istiqamətində atdığı addımlar barədə danışıb.
Görüşdə 2020-ci ildə Azərbaycanın Vətən müharibəsində qazandığı Qələbə, öz ərazilərini Ermənistanın 30 illik işğalından azad etməsi və ərazi bütövlüyünü bərpa etməsi, münaqişənin həllindən sonra regionda yeni yaranmış vəziyyət barədə məlumat verən Milli Məclisin sədri diqqətə çatdırıb ki, Azərbaycan işğaldan azad edilmiş ərazilərdə genişmiqyaslı bərpa işlərinə başlayıb. Azad edilmiş ərazilərdə ağıllı şəhər və kəndlər tikilir, infrastruktur və nəqliyyat layihələri icra edilir. Hazırda keçmiş məcburi köçkün ailələri artıq evlərinə qayıtmağa başlayıblar. Parlamentin sədri deyib ki, Azərbaycan regionda davamlı sülh və təhlükəsizliyin təmin olunması istiqamətində bütün lazımi səyləri göstərir. Lakin Ermənistan destruktiv mövqe nümayiş etdirərək bu prosesə mənfi təsir göstərən addımlarını davam etdirir.
Qeyd edək ki, görüşdə Türkmənistanla parlamentlərarası əlaqələr üzrə işçi qrupunun rəhbəri Fəzail Ağamalı, deputatlardan Əziz Ələkbərov, Jalə Əliyeva, Şahin İsmayılov, Vahid Əhmədov, Cəbi Quliyev, Elşən Musayev və digər rəsmi şəxslər iştirak ediblər.
Görüş başa çatandan sonra Azərbaycan Milli Məclisi ilə Türkmənistan Milli Qenqeşi Xalq Məsləhəti arasında əməkdaşlığa dair Anlaşma Memorandumu imzalanıb.
Sənədi Milli Məclisin sədri Sahibə Qafarova və Türkmənistan Milli Qenqeşi Xalq Məsləhətinin sədri Qurbanqulu Berdiməhəmmədov imzalayıblar.
Qeyd olunub ki, bu sənəd iki ölkənin qanunverici orqanları arasında münasibətlərin daha da genişləndirilməsinə imkan verəcək.
Bölmənin digər xəbərləri
