Azərbaycanın daha 2 boksçusu beynəlxalq turnirə qələbə ilə başlayıb
Bakı, 25 fevral, AZƏRTAC
Bolqarıstanın paytaxtı Sofiyada boks üzrə “Strandja” beynəlxalq turniri davam edir.
Azərbaycan Boks Federasiyasından AZƏRTAC-a verilən məlumata görə, yarışın ikinci günündə Azərbaycan millisinin daha 2 idmançısı qələbə qazanıb.
55 kiloqramda Zidan Hünbətov 1/8 finalda Jirayr Sarqsyanla (Ermənistan) döyüşüb. Boksçumuz erməni rəqibinə heç bir şans verməyib və hakimlərin yekdil qərarı ilə qələbə qazanıb – 5:0 (29:28, 29:28, 29:28, 29:28, 29:28). O, növbəti görüşdə ukraynalı Maksim Zimenko (Ukrayna) ilə üz-üzə gələcək. Döyüş fevralın 27-nə təsadüf edəcək.
Malik Həsənov (65 kiloqram) da turnirə qələbə ilə başlayıb. O, Cakomo Canniottini (İtaliya) məğlub edib. Rəqib zədələndiyi üçün boksçumuz ikinci raundda qalib elan olunub – 4:0 (20:18, 19:19, 20:18, 20:18, 20:18). Həsənov fevralın 26-da 1/8 finalda ilk mərhələdən azad olan Artur Saakyanla (Ermənistan) qarşılaşacaq.
Qeyd edək ki, yarışa martın 1-də yekun vurulacaq.
Bölmənin digər xəbərləri
