Bakı, 8 iyul, AZƏRTAC

Azərbaycanın tarixi torpaqlarını 30 il işğal altında saxlayaraq havadarlarının dəstəyi ilə beynəlxalq hüququn norma və prinsiplərinə məhəl qoymayan, BMT qətnamələrinin icrası barədə düşünməyən Ermənistan tarixi Qarabağ Zəfərimizdən sonra bu “ərköyünlüyünü” davam etdirə biləcəyini düşünsə də, artıq bunun mümkünsüzlüyünün fərqindədir. Ermənistan unudur ki, ölkəmiz artıq 30 il davam edən işğal dövrünün Azərbaycanı deyil. Bu gün sülh gündəliyinin və yeni əməkdaşlıq formatlarının müəllifi kimi çıxış edən Azərbaycan şanlı Qələbəmizin yeni reallıqlarını dünyaya qəbul etdirmək üçün ciddi addımlar atır və bunun müsbət nəticələri göz qabağındadır. İki ildən çoxdur ki, vəziyyət tamamilə dəyişib. Azərbaycan bölgədə dayanıqlı sülhün və təhlükəsizliyin təmin edilməsi, Ermənistanla münasibətlərində yeni səhifənin açılması üçün qarşı tərəfə sülh müqaviləsinin imzalanması təklifini edib.

Bu fikirləri AZƏRTAC-a açıqlamasında Yeni Azərbaycan Partiyası Xətai rayon təşkilatının sədri, siyasi elmlər doktoru Vüqar Rəhimzadə bildirib.

V.Rəhimzadə qeyd edib ki, Azərbaycan işğal dövründə ən yüksək beynəlxalq tribunalardan Ermənistana qarşı ciddi sanksiyaların tətbiq olunmasını tələb etsə də, dünya güclərinin ikili standartlara əsaslanan siyasəti ədaləti, beynəlxalq hüququ arxa plana keçirir, işğalçı müdafiə edilirdi. Hətta ölkəmizin ordu quruculuğu sahəsində gördüyü işlərə müdaxilələr geniş miqyas alır, bu, Azərbaycanın sülh danışıqlarından imtinası, müharibəyə hazırlaşması kimi təqdim edilirdi. Rəsmi Bakı daim bəyan edirdi ki, bu, Azərbaycanın suveren hüququdur. Təsadüfi deyil ki, tarixi Zəfərimizdə diplomatik mübarizədə qələbəmizin, eyni zamanda, münaqişənin həlli üçün möhkəm hüquqi bazanın mövcudluğu əhəmiyyətli rol oynadı.

YAP Xətai rayon təşkilatının sədri bildirib ki, bütün bunları qeyd etməyimiz səbəbsiz deyil. Məsələ burasındadır ki, Ermənistan daim Azərbaycanın suveren hüquqlarını pozaraq özünün əsassız iddialarını həqiqət kimi qəbul etdirməyə çalışmaqla apardığı təbliğatın “həqiqət” olduğuna havadarlarının vasitəsilə bəzi dünya güclərini inandırmağa çalışır. Bu gün artıq postmünaqişə dövrünün reallıqlarını yaşayırıq. Bu reallıqları inkar edən, onu qəbul etməmək üçün cəhdlər göstərən işğalçı Ermənistan növbəti dəfə uğursuzluğa düçar oldu. Azərbaycan növbəti diplomatik uğuru ilə dünyanın diqqətində oldu. Ermənistan ilə sərhəddə, Laçın-Xankəndi yolunun başlanğıcında sərhəd-buraxılış məntəqəsi qurulması İkinci Qarabağ müharibəsində tarixi Zəfərimizin son mərhələsi kimi də dəyərləndirilə bilər. Azərbaycan tərəfinin öz suveren ərazisində, sərhəddə nəzarət-buraxılış məntəqəsinin təsis edilməsi barədə legitim qərarı və addımı beynəlxalq hüququn bütün prinsiplərinə və normalarına uyğundur. Ermənistanın Azərbaycanın bu qərarına müdaxiləsi qəbuledilməzdir.

Bildirilib ki, bu mühüm addım Ermənistanı və onun havadarlarını məyus etdi. Müxtəlif əsassız fikirlərlə beynəlxalq ictimaiyyətdə çaşqınlıq yaratmağa çalışdılar. İşğalçı dövlət heç bir əsası olmayan bu kimi təbliğatları ilə kifayətlənməyib Beynəlxalq Ədalət Məhkəməsinə müraciət etdi. Cari ilin iyulun 6-da Beynəlxalq Ədalət Məhkəməsi Ermənistanın mayın 12-də Məhkəməyə təqdim etdiyi və aprelin 23-də Laçın yolunun başlanğıcında sərhəd-buraxılış məntəqəsinin qurulmasının “qanunsuz” olduğuna dair vəsatətini iyulun 6-da yekdilliklə rədd etdi. Bununla da Məhkəmə Azərbaycanın Ermənistanla şərti dövlət sərhədlərində nəzarət-buraxılış məntəqəsini qurmağa beynəlxalq hüquq əsasında suveren hüquqa malik olduğunu rəsmən tanıdı. Azərbaycan Beynəlxalq Ədalət Məhkəməsinin Qərarını və beynəlxalq hüquqi öhdəliklərini yerinə yetirməkdədir. Ölkəmiz, eyni zamanda, Ermənistanın beynəlxalq hüququn davamlı şəkildə və tarixi ağır pozuntularına görə məsuliyyətə cəlb olunması istiqamətində bütün zəruri tədbirləri davam etdirəcək. Azərbaycanın Ermənistanla sərhəddə nəzarət-buraxılış məntəqəsi təsis etmək qərarı onun sərhədlərinin mühafizəsi üzrə suveren hüququdur. Həmin məntəqə yaradılandan indiyədək erməni əsilli yerli sakinlər Azərbaycanın daxili və beynəlxalq öhdəlikləri çərçivəsində giriş-çıxışda nəzarətin həyata keçirildiyi məntəqədən sərbəst şəkildə keçirlər.

YAP Xətai rayon təşkilatının sədri Beynəlxalq Ədalət Məhkəməsinin qərarını Azərbaycanın növbəti uğuru kimi dəyərləndirib. Bildirilib ki, Azərbaycanın ədalətə və beynəlxalq hüquqa əsaslanan siyasəti davamlı uğurları ilə diqqətdədir.