Azərbaycanın enerji siyasəti əməkdaşlığa, təhlükəsizliyə, qarşılıqlı etimada və etibara əsaslanır- ŞƏRH
Bakı, 8 iyun, AZƏRTAC
Bu gün karbohidrogen ehtiyatlarının dünya bazarına çıxarılması, eləcə də Şimal marşrutu üzrə enerji axınında yaranmış çətinliklər fonunda Azərbaycanın strateji mövqeyinin artması danılmaz reallığa çevrilib. Bu mövqenin sabit və davamlı olmasının əsas səbəbi isə 1994-cü ildə imzalanmış “Əsrin müqaviləsi” və onun uğurlu icrası faktıdır. Məhz bu müqavilə ilə xarici investisiyanın ictimai-siyasi sabitlik əldə etmiş Azərbaycana yatırılması, neft-qaz sənayesinin pay bölgüsü əsasında işlənməsi ümumilikdə Azərbaycan iqtisadiyyatında və sənayesində yeni bir eranın başlanğıcı oldu.
Bu sözləri AZƏRTAC-a açıqlamasında politoloq Amid Əliyev söyləyib.
İkinci Qarabağ müharibəsində Zəfər qazanan Azərbaycanın xarici diplomatiyasının əsas istiqamətinin məhz enerji siyasəti olduğunu deyən politoloq bildirib: “İlkin olaraq Cənub Qaz Dəhlizinin istismara verilməsi ilə Azərbaycan Avropanın, xüsusilə də Cənub-Şərqi Avropanın bir sıra qabaqcıl dövlətlərinin enerji tədarükçüsünə çevrildi. Bu, eyni zamanda, NATO kimi siyasi-hərbi ittifaqa üzv olan dövlətlərlə yeni enerji müstəvisində əməkdaşlıq platforması kimi qiymətləndirilə bilər. Artıq Avropa İttifaqının (Aİ) 9 üzv ölkəsi ilə Azərbaycan arasında strateji tərəfdaşlıq haqqında sənəd imzalanıb, digər dövlətlərin isə bu platformada pay sahibi olmaları üçün səy göstərdiklərini görürük.
XXI əsrdə enerji siyasətinin dövlətlərin milli təhlükəsizlik prizmasından qiymətləndirildiyi bir zamanda Azərbaycanın ən ideal təminatçı olması artıq Aİ-nin yüksək tribunalarında aparıcı diplomatlar tərəfindən dəfələrlə səsləndirilib. 2022-ci il iyulun 18-də Bakıda imzalanan Azərbaycan ilə Avropa İttifaqı (Aİ) arasında enerji sahəsində Strateji Tərəfdaşlığa dair Anlaşma Memorandumu zamanı Avropa Komissiyasının prezidenti Ursula Fon der Lyayenin “Azərbaycandan Avropa İttifaqına təchiz edilən qazın həcmini ikiqat artıracağıq" fikrini səsləndirməsi bunun bariz nümunəsidir”.
O vurğulayıb ki, Azərbaycan tərəfindən həyata keçirilən enerji siyasəti həm də regional əməkdaşlığın və təhlükəsizliyin qarantı kimi ifadə olunur. ABŞ Prezidenti Cozef Baydenin 28 May - Müstəqillik Günü münasibətilə dövlətimizin başçısına ünvanladığı məktubunda “Diplomatik əlaqələrimizin 30 ildən artıq bir dövründə biz enerji təhlükəsizliyi, regional təhlükəsizlik və terrorçuluqla mübarizə də daxil olmaqla birgə maraqlara söykənən tərəfdaşlıq qurmuşuq. Hər iki ölkəmiz Əfqanıstanda çiyin-çiyinə döyüşmüş və birlikdə Cənub Qaz Dəhlizini inkişaf etdirməklə regional enerji təhlükəsizliyi ilə bağlı çağırışlara sinə gərmişdir” fikirlərini qeyd etməsi Azərbaycanın bu sahədə regional güc olmasına açıq işarədir. Bütün bunlar onu deməyə əsas verir ki, Azərbaycanın enerji siyasəti əməkdaşlığa, təhlükəsizliyə, qarşılıqlı etimada və etibara əsaslanır. Ötən illər ərzində Azərbaycan özünün enerji tərəfdaşları ilə imzaladığı bütün müqavilələrə tam şəkildə sadiq qalıb. Regionda, eləcə də bölgədən kənarda baş verən siyasi, iqtisadi və hərbi proseslər isə bu etimada təsir edə bilməyib. Məhz bunun nəticəsidir ki, Ərəbistan yarımadası, Mərkəzi Asiya, Avropa və Uzaq Şərq kimi böyük bir coğrafiyada yerləşən dövlətlər öz enerji tələbatlarının ödənilməsində tərəfdaş kimi Azərbaycanı seçirlər. Bu da ölkəmizin nəinki regional, hətta beynəlxalq yeni siyasi imicinin formalaşması prosesi kimi dəyərləndirilməlidir.
“Yeni əsrin birinci dekadasında Azərbaycan bölgədə siyasi iradəsi və hərbi qüdrəti olan dövlət kimi tanınmaqla yanaşı, etibarlı enerji təminatı mərkəzi kimi də vacib ad qazanıb. Bu da Azərbaycanın yeni dünya nizamında qlobal səviyyədə siyasi və iqtisadi maraqlarının davamlı olmasına xidmət edəcək”, - deyə A.Əliyev diqqətə çatdırıb.
Bölmənin digər xəbərləri
