Bakı, 11 aprel, AZƏRTAC

2018-ci il aprelin 11-də növbədənkənar prezident seçkilərindən 5 il keçir. Ölkəmizin həyatında əlamətdar olan hər bir hadisə daim keçilən yolun təhlili fonunda qarşıdakı dövrün hədəflərinə diqqət yetirməyi bir tələbə çevirir. Seçkilərin növbədənkənar keçirilməsi özündə bütün məqamları, çağırışları ehtiva edib. Belə ki, Azərbaycan ərazilərinin uzun illər boyu davam edən işğalına tezliklə son qoymaq üçün dövlətin daha da gücləndirilməsi, ölkə daxilində islahatları sürətləndirərək çevik idarəetmənin qurulması, xalqın hakimiyyətə etimadının bir daha sınaqdan çıxarılması üçün növbədənkənar seçkilərin keçirilməsi zəruri idi. Yaranmış mürəkkəb beynəlxalq şərait, müxtəlif dövlətlər arasında münasibətlərin gərginləşməsi çevik addımların atılmasını labüd etmişdir. 2018-ci il aprelin 11-də prezident seçkiləri Azərbaycanın həyatında yeni bir mərhələnin başlanğıcı oldu. Dövlətimizin başçısı İlham Əliyevin 20 ilə yaxın prezidentliyi dövrünün 2003-2020-ci illəri torpaqlarımızın işğaldan azad edilməsinə hazırlıq, son iki ildən çoxu bu ərazilərdə quruculuq işlərinin aparılması mərhələsi kimi xarakterizə edilir. Ümumilikdə dövlətimizin başçısının bu illər ərzində xalqa verdiyi hər bir vədini konkret əməldə təsdiqləməsi Prezident-xalq birliyini daha da möhkəmləndirir, sarsılmaz edir. Möhtərəm Prezidentimiz ilk gündən bəyan etdi ki, Azərbaycanın qüdrətli dövlətə çevrilməsi üçün Ulu Öndər Heydər Əliyevin siyasəti davam etdirilməlidir. 20 ilə yaxın dövrün reallıqları bu vədin sözdə deyil, əməldə təsdiqidir. Prezident İlham Əliyev Ümummilli Liderin 2003-cü ildə xalqa tarixi müraciətində əksini tapan inamı və etimadı uğurlu siyasəti, təkmil islahatları ilə doğrultdu.

Bu fikirləri AZƏRTAC-a açıqlamasında Milli Məclisin deputatı Malik Həsənov bildirib.

Deputat vurğulayıb ki, Azərbaycan iqtisadi, siyasi, humanitar, diplomatik, xarici siyasət sahəsində davamlı uğurları ilə diqqətdə oldu. Prezident İlham Əliyev iqtisadi tərəqqini ilk gündən bütün inkişafın əsası kimi dəyərləndirdi və belə bir çağırış etdi ki, “Neft kapitalını insan kapitalına çevirək!”. Regionların malik olduğu potensialdan səmərəli istifadə edərək qeyri-neft sektorunun sürətli inkişafını təmin etmək üçün Regional İnkişaf proqramları təsdiqləndi və uğurla icra edilir. Dördüncü Dövlət Proqramı Prezident İlham Əliyevin Fərmanı ilə 2019-cu ildə təsdiqləndi. “Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı”nın icrasının sonuncu ilindəyik. Tarixi Zəfərimizdən sonra yeni Dövlət Proqramlarının, İnkişaf Strategiyasının təsdiqlənməsinə böyük zərurət yarandı. “Azərbaycan 2030: sosial-iqtisadi inkişafa dair Milli Prioritetlər” bunun bariz nümunəsidir.

M.Həsənov bildirib ki, qeyri-neft sektorunun inkişafına geniş imkanlar yaradan enerji diplomatiyamız da dünyanın diqqətindədir. “2003-2018-ci illərdə enerji sektorunda qazanılan uğurların davamı olaraq 2018-ci ilin may ayında Cənub Qaz Dəhlizinin rəsmi açılışı oldu. Həmin ilin iyun ayında bu layihənin əsas tərkib hissələrindən olan TANAP, 2020-ci ilin sonunda isə TAP istifadəyə verildi. Son illərdə bərpa olunan enerji mənbələrinə investisiyaların yatırılmasının əsas hədəf olduğunu nəzərə alsaq Azərbaycanın bu sahədə qazandığı uğurlar imzalanan sənədlərdən aydın görünür. Ötən ilin iyulunda Avropa İttifaqı ilə Azərbaycan Respublikası arasında enerji sahəsində Strateji Tərəfdaşlığa dair Anlaşma Memorandumu, Buxarestdə Azərbaycan, Gürcüstan, Rumıniya və Macarıstan Hökumətləri arasında yaşıl enerjinin inkişafı və ötürülməsi sahəsində strateji tərəfdaşlıq haqqında Sazişin imzalanması Azərbaycanın etibarlı tərəfdaş kimi möhkəmlənən mövqeyinin nümayişidir”, - deyə o qeyd edib.

Azərbaycanın son 5 ildə qazandığı uğurları bir yazıda əhatə etməyin mümkünsüzlüyünü bildirən deputat qeyd edib ki, 2018-ci ilin prezident seçkilərinin nəticələri xalqın iradəsini əks etdirdi: Azərbaycan xalqı görülən işlərə səs verdi. Prezident İlham Əliyevə səs verməklə ölkədə aparılan demokratik islahatlara səs vermiş oldu. Demokratik institutların inkişafı ilə bağlı siyasət davamlı olaraq reallaşdırılır. Siyasi müstəqillik sayəsində Azərbaycan xalqı öz taleyinin sahibidir. Dövlətimizin başçısı İlham Əliyev 2018-ci il aprelin 18-də keçirilən andiçmə mərasimində bildirmişdir ki, həmişə Azərbaycan xalqının dəstəyini hiss etmişəm və hiss edirəm. Bu dəstək mənə güc verir.

Malik Həsənov qeyd edib ki, əsrə bərabər olan 20 ilə yaxın dövrün zirvəsində torpaqlarımızın işğaldan azad edilməsi dayanır. Prezident, Müzəffər Ali Baş Komandan İlham Əliyevin rəhbərliyi ilə şanlı Ordumuzun çoxəsrlik tariximizə yazdığı Zəfər səhifəsi xalqımızın yenilməzliyinin, məğrurluğunun təsdiqi oldu. Azərbaycan qalib ölkəyə, xalqımız qalib xalqa çevrildi. Bu Qələbə sayəsində regionda yeni reallıqlar yarandı. Bu reallıqlar Azərbaycanın sözünün imzası qədər əhəmiyyətini daha da artırır. İşğaldan azad edilmiş ərazilərdə sıfırdan başlayan genişmiqyaslı bərpa-quruculuq işləri ölkəmizin malik olduğu iqtisadi imkanları nümayiş etdirir. İlklərə imza atan Azərbaycan Prezident İlham Əliyevin rəhbərliyi ilə dünyaya təkmil dirçəliş modelini təqdim edir. Azərbaycanın inkişaf strategiyası real hədəflərə yönəlib.