Haaqa, 20 may, AZƏRTAC

Niderlandda fəaliyyət göstərən birləşmiş diaspor təşkilatları - Niderland-Azərbaycan Əlaqələndirmə Platforması (NACP), Benilüks Azərbaycanlıları Konqresi, Azərbaycan-Türk Mədəniyyət Dərnəyi, “Ana Vətən” Niderland Azərbaycanlı Qadınlar Birliyi Ermənistan-Azərbaycan, Dağlıq Qarabağ münaqişəsi ilə bağlı həqiqətlərin Niderland ictimaiyyətinə çatdırılmasına və erməni yalanlarının ifşasına dair petisiyanı Azərbaycan səfirliyinin dəstəyi ilə bu ölkənin parlamentinin Nümayəndələr Palatasına təqdim ediblər.

Petisiya Nümayəndələr Palatasının xarici əlaqələr komitəsinin üzvləri Fred Teeven (Azadlıq və Demokratiya naminə Xalq Partiyası - VVD), Han Ten Broeke (VVD), Mixael Servaes (Əmək Partiyası - PVDA), Harri van Bommel (Sosialist Partiyası - SP), Raymond Knops (Xristian Demokatlar Partiyası - CDA), Səlcuq Öztürk (“Denk” parlament qrupu) tərəfindən qəbul olunub.

NACP-in sədri Arnold Utama çıxış edərək Ermənistanın Azərbaycana qarşı 20 ildən çox davam edən təcavüzkar siyasətindən söz açıb, Ermənistanda hakimiyyətdə olan işğalçı rejimin beynəlxalq hüququn normalarına məhəl qoymamasını, BMT Təhlükəsizlik Şurasının dörd qətnaməsini, eləcə də Avropa Şurası, İslam Əməkdaşlıq Təşkilatı və digər beynəlxalq təşkilatların münaqişə ilə bağlı qəbul etdiyi qərarları icra etməməsini diqqətə çatdırıb.

“Ana Vətən” Niderland Azərbaycanlı Qadınlar Birliyinin üzvü Sevinc Əfəndiyeva cari ilin aprel ayında qoşunların təmas xəttində Ermənistanın törətdiyi təxribat haqqında deputatlara məlumat verərək təmas xəttinə yaxın kəndlərdə azərbaycanlı dinc əhalinin hədəfə alındığını, Ermənistan tərəfindən humanitar hüququn prinsiplərinin kobud şəkildə pozulduğunu vurğulayıb. Aprelin 5-də Azərbaycan və Ermənistan silahlı qüvvələrinin baş qərargah rəisləri səviyyəsində əldə olunmuş atəşkəsə məhəl qoymayaraq, Ermənistanın vəziyyəti daha da gərginləşdirməsi, dinc insanları və sosial obyektləri hədəfə alması və münaqişənin həlli üzrə danışıqlardan imtina etməsi kimi təxribatçı əməllərinin beynəlxalq ictimaiyyət tərəfindən qəti şəkildə qınanmalı və pislənilməli olduğu diqqətə çatdırılıb.

Azərbaycan-Türk Mədəniyyət dərnəyinin nümayəndəsi Hüseyn Alper Kavak davam edən gərginliyin başlıca səbəbinin beynəlxalq ictimaiyyətin tələblərinə baxmayaraq erməni silahlı qüvvələrinin Azərbaycanın Dağlıq Qarabağ bölgəsi və onun ətrafındakı 7 rayonu işğal altında saxlaması olduğunu qeyd edib. Bildirilib ki, erməni qoşunlarının sözügedən ərazilərdən çıxarılmaması ölkədaxili və regional təhlükəsizliyə böyük təhdiddir. Ermənistanın Minsk qrupu çərçivəsində aparılan danışıqlardakı destruktiv mövqeyi hazırkı status-kvonun saxlanılmasına və işğalın davam etdirilməsinə yönəlib.

Benilüks Azərbaycanlıları Konqresinin üzvü Xatirə Abdullayeva əslən Şuşa şəhərindən olduğunu vurğulayaraq işğal olunmuş ərazilərdə aparılan etnik təmizləmə nəticəsində qaçqın və məcburi köçkün düşən bir milyon azərbaycanlının hüquqlarının kobud şəkildə pozulduğunu xatırladıb və insan hüquqlarını prioritet elan etmiş Niderland parlamentinin bu problemə lazımı diqqət ayırmasının və məsələyə hüquqi qiymət verməsinin vacibliyini vurğulayıb.

Qeyd olunub ki, münaqişənin tezliklə həlli məqsədilə beynəlxalq ictimaiyyət Ermənistanın işğalçı siyasətini pisləməli və qarşı tərəfə müvafiq təzyiq göstərməlidir. Məsələyə neytral münasibət işğalçı rejimdə özünə əminlik yaratmağa, hazırkı vəziyyəti daha da gərginləşdirməyə səbəb olur.

Görüşün sonunda adları qeyd olunan dörd təşkilat adından holland və ingilis dillərində hazırlanmış petisiya qarşı tərəfə təqdim olunub və Niderland tərəfinin müvafiq fikir bildirməsi xahiş olunub.

Petisiyanı qəbul edən deputatlar məlumata görə təşəkkür edərək son dövrlərdə Ermənistan və Azərbaycan arasında atəşkəsin intensiv şəkildə pozulmasının və aprel ayında açıq hərbi toqquşmanın narahatlıq doğurduğunu, xüsusən də mülki əhalinin baş verənlərdən əziyyət çəkməsinin yolverilməzliyini diqqətə çatdırıblar. Eyni zamanda, deputatlar Azərbaycan tərəfinin mövqeyinin xarici əlaqələr komitəsinə çatdırılacağını və onun nəzərə alınacağını qeyd ediblər.

Şəhla Ağalarova

AZƏRTAC-ın xüsusi müxbiri

Haaqa