Azərbaycanın proseslərə təsiretmə imkanları bir çox güclər tərəfindən qısqanclıqla qarşılanır
Bakı, 21 dekabr, AZƏRTAC
Avropa İttifaqının Ermənistan-Azərbaycan sərhədində prosesləri, vəziyyəti yerindəcə qiymətləndirmək üçün müvəqqəti missiyasının bölgəyə göndərilməklə bağlı razılaşması Avropa siyasi birliyinin Praqada keçirilən ilk iclası zamanı razılaşdırılıb. Həmin razılaşmaya əsasən Avropa İttifaqının bu monitorinq missiyası qısa müddətli dövrü əhatə etməklə Ermənistan-Azərbaycan sərhədinin Ermənistan hissəsində yerləşməli və prosesi, xüsusilə də atəşkəsin pozulması ilə bağlı monitorinq həyata keçirərək hesabat təqdim etməli idi. Dekabrın 19-da bu missiya uğursuzluqla başa çatmış oldu. Bu missiya fəaliyyəti dövründə demək olar ki, Ermənistan-Azərbaycan sərhədi boyunca Ermənistan tərəfindən atəşkəsin pozulması halları ilə bağlı heç bir hesabat təqdim etmədi. Əslində bununla da missiya özünün uğursuzluğuna imza atmış oldu. Eyni zamanda, hələ Praqa görüşü zamanı Fransa başqa olmaqla kənar qüvvələrin Avropa İttifaqı institutu adı altında bölgəyə daxil olmaq istəyini özündə əks etdirən bu missiya təşəbbüsünə Azərbaycan haqlı olaraq etirazını bildirdi. Bunu Fransa kimi qərəzli dövlətlərin bölgəyə daxil olma cəhdi kimi qiymətləndirdi. Ötən dövr ərzində baş verən hadisələr və proseslər, xüsusilə də müvəqqəti missiyanın üzdə qarşıya qoyulan məqsədləri ifadə etməməsi, bu hədəflərlə bağlı heç bir hesabatlar verməməsi Azərbaycan Prezidenti İlham Əliyevin o zaman Praqada sərgilədiyi mövqeyinin nə qədər haqlı olduğunu bir daha sübut etmiş oldu.
Bu sözləri AZƏRTAC-a açıqlamasında politoloq Anar Əliyev deyib.
O bildirib ki, Avropa İttifaqı xüsusilə də bu institut üzərindən Cənubi Qafqazdakı proseslərə daxil olmaq ideyasında olan dövlətlərin yenidən Lüksemburqda yeni missiya təşkil etmək və onu yenidən bölgəyə göndərməklə bağlı cəhdləri Praqa görüşü zamanı əldə olunmuş razılaşmanın, yəni, bu missiyanın müvəqqəti xarakter daşıması fikirləri ilə ziddiyyət təşkil edir. Eyni zamanda, bu, Ermənistan-Azərbaycan arasında əldə olunmuş kövrək sülhün möhkəmləndirilməsinə deyil, tamamilə əksinə, həmin dövlətlərin maraqlarına xidmət edərək bununla da sülh prosesinə zərbə vurmaq məqsədi daşıyır. Bu mənada yeni missiyanın yaradılması və ona əlavə səlahiyyətlər, mandatlar verməklə bölgəyə göndərilmək istəyi Avropa İttifaqının da proseslərlə səmimi deyil, riyakar yanaşdığını nümayiş etdirir. Həmçinin Avropa institutlarının bir neçə dövlətin əlində oyuncağa çevrildiyini göstərir.
Fransanın qərəzli, ikiüzlü, riyakar mövqeyinin Avropa ittifaqı siyasətinin əsasını təşkil etməyə başladığını vurğulayan Anar Əliyev deyib: “Azərbaycanın Cənubi Qafqazdakı proseslərə təsir etmə imkanları bir çox güclər, eləcə də, Avropa İttifaqı üzvləri tərəfindən qısqanclıqla qarşılanır. Ona görə də yeni missiyanın yaradılması Avropa İttifaqı Şurası timsalında proseslərin təzələnməsi ilə bağlı yeni platforma təklif edən tərəflərə olan etimadı sarsıdır, birmənalı şəkildə Brüssel formatını sual altına almış olur. Bu mənada Azərbaycan dövlətinin bu günədək sərgilədiyi mövqe nə qədər haqlı olduğumuzu, heç bir halda Fransa kimi dövlətlərə və bu cür ölkələrin təmsil olunduğu təşkilatlara tam güvənməyin mümkünsüzlüyünü bir daha sübut edir”.
Politoloq, həmçinin bunu beynəlxalq hüququn siyasi münaqişələrlə bağlı qəbul edilmiş prinsiplərinin kobud şəkildə pozulması kimi qiymətləndirib. Bildirib ki, bu, beynəlxalq hüququn münaqişələri sülh yolu həllə çağırış prinsipi ilə kobud şəkildə ziddiyyət təşkil edir. Çünki bu missiyanın yaradılması hədəflərindən biri də Ermənistanda yeni əhval-ruhiyyənin formalaşdırılması və Azərbaycanla indiki şərtlər daxilində sülh prosesinə gedilməməsini stimullaşdırmağa xidmət edir. Eyni zamanda, bu, beynəlxalq hüququn dövlətlərin daxili işinə qarışmama prinsipi ilə kobud şəkildə ziddiyyət təşkil edir. Çünki beynəlxalq hüququn bu prinsipinə əsasən ölkədaxili bütün proseslər dövlətin suveren hüquqlarına aiddir və həmin hüquqları məhdudlaşdırmaq heç bir gücün, heç bir dövlətin və ya beynəlxalq təşkilatın səlahiyyətləri daxilində ola bilməz. İndiki halda yeni missiya yaratmaq və onun hədəflərindən birinin də Qarabağdakı ermənilərin hüquqları ilə bağlı məsələləri özündə əhatə etməsi Azərbaycanın daxili işinə kobud şəkildə müdaxilə və suveren hüquqlarımızın pozulması deməkdir. Azərbaycan dəfələrlə açıq şəkildə bəyan edib ki, Qarabağdakı erməni azlığının hüquq və təhlükəsizliyi Azərbaycanın daxili işdir. Buna kiminsə qarışmağa və müdaxilə etməyə hüququ yoxdur. O hüquq və təhlükəsizlik Azərbaycan dövləti tərəfindən təmin ediləcəkdir.
Bölmənin digər xəbərləri
